

- ભુજના આરટીઓ સર્કલ પાસે એકલી બસો રોકવાનો પ્રયાસ કરતી બાળકી પર જાગૃત નાગરિકની નજર પડતાં પોલીસને જાણ કરાઈ; મહિલા પોલીસ કર્મચારીઓએ બાળકીને હેમખેમ શોધી પરિવારને સોંપી
કચ્છ, 20 નવેમ્બર (હિ.સ.) ભુજ શહેરમાં એક નાનકડી બાળકી ઘરેથી કોઈને જાણ કર્યા વિના નીકળી જતાં ચિંતાજનક સ્થિતિ સર્જાઈ હતી. જોકે, એક જાગૃત નાગરિકની સતર્કતા અને ભુજ શહેર પોલીસની શી-ટીમની સમયસૂચક કામગીરીના કારણે બાળકી સાથે કોઈ અનિચ્છનીય ઘટના બને તે પહેલાં જ તેને સુરક્ષિત રીતે પરિવાર સુધી પહોંચાડવામાં આવી હતી. પોલીસની આ કામગીરીએ નાગરિક જાગૃતિ અને મહિલા પોલીસની સંવેદનશીલ ફરજનું ઉત્તમ ઉદાહરણ પૂરું પાડ્યું છે.
મળતી માહિતી મુજબ, ભુજ શહેર પોલીસની શી-ટીમ નિયમિત પેટ્રોલિંગ કરી રહી હતી ત્યારે એક જાગૃત નાગરિક દ્વારા પોલીસનો સંપર્ક કરવામાં આવ્યો હતો. નાગરિકે આરટીઓ સર્કલ નજીક આશરે 10 વર્ષની એક બાળકી એકલી ફરતી હોવાની જાણ કરી હતી. બાળકી રસ્તા પરથી પસાર થતી બસોને હાથ બતાવી રોકવાનો પ્રયાસ કરી રહી હતી અને પોતાને રાજસ્થાન લઈ જવા માટે કહી રહી હતી. આ દૃશ્ય જોઈ નાગરિકને બાળકીની સુરક્ષા અંગે ચિંતા થતાં તાત્કાલિક પોલીસને જાણ કરી હતી.
માહિતી મળતાં જ શી-ટીમમાં ફરજ બજાવતાં એએસઆઈ શીતલ નાઈ અને જશોદા ધ્રાંગી વિલંબ કર્યા વિના આરટીઓ સર્કલ ખાતે પહોંચ્યાં હતાં. બંને મહિલા પોલીસ કર્મચારીઓએ બાળકીને પ્રેમપૂર્વક વિશ્વાસમાં લઈ તેની સાથે વાતચીત શરૂ કરી હતી. પ્રાથમિક પૂછપરછ દરમિયાન બાળકીની ઓળખ આરતી તરીકે થઈ હતી. તે ભુજના કોડકી ચાર રસ્તા નજીક આવેલા ઝૂંપડપટ્ટી વિસ્તારમાં રહેતી હોવાનું જાણવા મળ્યું હતું.
વધુ પૂછપરછમાં બાળકીના પિતાએ ઠપકો આપ્યો હોવાથી તે નારાજ થઈ કોઈને જાણ કર્યા વગર ઘરેથી નીકળી ગઈ હોવાનું સામે આવ્યું હતું. આ બાબતને ગંભીરતાથી લઈ શી-ટીમે તાત્કાલિક તેના પરિવારજનોનો સંપર્ક કર્યો હતો. ત્યારબાદ પોલીસ કર્મચારીઓ બાળકી સાથે તેના રહેણાક વિસ્તારમાં પહોંચ્યાં હતાં અને પરિવારજનોને સમજાવી બાળકીનો સુરક્ષિત કબજો સોંપ્યો હતો.
નાની ઉંમરે આવેશમાં આવીને ઘરેથી નીકળી જવું બાળકો માટે જોખમી બની શકે છે. આવી પરિસ્થિતિમાં પરિવારની તકેદારી, બાળકો સાથે સંવાદ અને આસપાસના નાગરિકોની જાગૃતિ અત્યંત જરૂરી છે. ભુજ શહેર પોલીસની શી-ટીમે સમયસર હસ્તક્ષેપ કરીને બાળકીનું સુરક્ષિત રીતે પરિવાર સાથે મિલન કરાવતાં સરાહનીય કામગીરી કરી છે.
હિન્દુસ્થાન સમાચાર / Rohit Ramjibhai Padhiyar