પાટણ, 08 નવેમ્બર (હિ.સ.) : દિવાળીના પાવન પર્વ નિમિત્તે પાટણમાં માનવતા અને સેવાભાવનું સુંદર ઉદાહરણ જોવા મળ્યું હતું. સ્લમ વિસ્તારમાં રહેતા ગરીબ અને જરૂરિયાતમંદ પરિવારો તથા બાળકો સાથે દિવાળીની ઉજવણી કરવામાં આવી હતી. આ પ્રસંગે બાળકોના ચહેરા પર ખુશી લાવવા અને તહેવારની આનંદમય ક્ષણો તેમની સાથે વહેંચવાના હેતુથી વિશેષ આયોજન કરવામાં આવ્યું હતું.

આયોજન દરમિયાન સ્લમ વિસ્તારના પરિવારો અને બાળકોને મીઠાઈનું વિતરણ કરવામાં આવ્યું હતું. સાથે જ બાળકો સાથે મળીને ફટાકડા ફોડવામાં આવ્યા હતા, જેના કારણે સમગ્ર વિસ્તારમાં દિવાળીના પર્વનો ઉત્સાહ અને આનંદ જોવા મળ્યો હતો. બાળકો માટે આ ઉજવણી યાદગાર બની હતી અને સૌએ એકબીજાને દિવાળીની શુભેચ્છાઓ પાઠવી હતી.

ઉલ્લેખનીય છે કે, હિન્દુ સંસ્કૃતિમાં દિવાળી આશા, પ્રકાશ, સુખ અને સમૃદ્ધિનું પ્રતીક માનવામાં આવે છે. ભગવાન શ્રીરામ 14 વર્ષના વનવાસ બાદ અયોધ્યા પરત ફર્યા ત્યારે દીવડા પ્રગટાવીને તેમનું સ્વાગત કરવામાં આવ્યું હતું, ત્યારથી દિવાળીની ઉજવણીની પરંપરા જોડાયેલી છે. આ જ ભાવનાને સાર્થક કરતાં વંચિત વર્ગના પરિવારોને પણ તહેવારની ખુશીઓમાં સામેલ કરી સામાજિક એકતા, માનવતા અને સેવાભાવનો સંદેશ આપવામાં આવ્યો હતો.

હિન્દુસ્થાન સમાચાર / હાર્દિક રાઠોડ