- ગાંધીનગર (ઉત્તર) ધારાસભ્ય રીટાબેન પટેલને હોલ ઓફ ફેમ એવોર્ડથી સનમાવામાં આવ્યા

ગાંધીનગર, 12 માર્ચ (હિ.સ.) : આંતરરાષ્ટ્રીય મહિલા દિવસની ઉજવણી નિમિત્તે ઉદગમ ચેરિટેબલ ટ્રસ્ટે મંગળવાર સાંજે ઉષા પર્વ અંતર્ગત વિવિધ ક્ષેત્રોમાં નોંધપાત્ર સિદ્ધિ પ્રાપ્ત કરનાર 30 થી વધુ મહિલાઓને સન્માનિત કરી. 17 મા ઉદગમ વુમન એચિવર્સ એવોર્ડ સમારોહ સાથે i-Hub ગુજરાતના સહયોગથી પ્રથમ મહિલા સ્ટાર્ટઅપ મહોત્સવનું પણ આયોજન કરવામાં આવ્યું.

KCG ઓડિટોરિયમ ખાતે યોજાયેલા આ કાર્યક્રમમાં 250 થી વધુ ઉદ્યોગસાહસિકો, રોકાણકારો, નીતિનિર્માતાઓ અને મહેમાનો ઉપસ્થિત રહ્યા. તેમણે 16 કેટેગરીમાં નવીનતા, સ્ટાર્ટઅપ અને સામાજિક ક્ષેત્રે પ્રભાવ સર્જનાર પ્રતિભાશાળી મહિલાઓને સન્માનિત કરી. સિદ્ધિપ્રાપ્તીઓની પસંદગી કડક જ્યુરી પ્રક્રિયા અને નૉમિનેશન આધારિત પદ્ધતિ દ્વારા કરવામાં આવી, જેથી શહેર અને ગ્રામ્ય વિસ્તારો બંનેનું પ્રતિનિધિત્વ સુનિશ્ચિત થાય.

આ પ્રસંગે ગુજરાતના મુખ્યમંત્રી ભુપેન્દ્ર પટેલે શુભેચ્છા સંદેશ મોકલી જણાવ્યું હતું કે, “કલ્યાણથી નેતૃત્વ સુધી, ભારતીય મહિલાઓ હવે દેશના ભવિષ્યને આકાર આપી રહી છે.”

ગાંધીનગર (ઉત્તર) ધારાસભ્ય રીટાબેન પટેલ, ભૂતપૂર્વ બ્યુરોક્રેટ સુનૈના તોમર અને પી.સી. સ્નેહલ ગ્રુપના ચિરંજીવ પટેલ, જીએમસીના મહિલા અને બાલ કલ્યાણ સમિતિના અધ્યક્ષા હેમાબેન ભટ્ટ સહિત અનેક માનનીય મહેમાનો હાજર રહ્યા.

આંતરરાષ્ટ્રીય મહિલા દિન નિમિતે સતત સત્તરમાં વર્ષે ઉદગમ ચેરીટેબલ ટ્રસ્ટએ ઉદગમ ટ્રસ્ટી ઉષાબેન ધ્રુવકુમાર જોશીની સ્મૃતિમાં ઉષાપર્વ માં વિવિધ ક્ષેત્રોમાં ઉદગમ વુમન એચિવર્સ એવોર્ડથી સન્માનિત થયેલી મહિલાઓમાં રક્ષા શુક્લા અને નીલમ કુલશ્રેષ્ઠા (સાહિત્ય); જિજ્ઞાશા ગોસ્વામી, હિમાલી ત્રિવેદી અને સાધના પરમાર (સામાજિક કાર્ય); રસના દવે અને ડૉ. ભાવિની સંદીપ શાહ (આરોગ્ય); ડૉ. મિરલ ઉત્કર્ષ પંચાલ, સુધા જોશી અને ગજ્જર ગીતાબેન મનુભાઈ (શિક્ષણ); અંજલી પ્રજેશકુમાર પટેલ અને પંખુરી સોની (યંગ અચિવર્સ); ડૉ. શિવાની કિનારીવાલા અને નમ્રતા રોનક શોધન (સંગીત); સેજલ જયદીપ બારોટ અને પ્રાચી પટવારી (ઉદ્યોગસાહસિકતા); ગિરા શાહ (પર્યાવરણ); આશા વર્વાભાઈ પટેલ (સ્પોર્ટ); પાયલ મહેતા (કોર્પોરેટ); આશા પ્રવીણ દાદ (દિવ્યાંગ); નિવેદિતા ગૌથી (ડિઝાઇન); ભાવના શૈલેષ મહેતા, હેતલ તેજસ ભટ્ટી, વિનિશા રૂપારેલ અને અભિપ્સા અપુર્વ દવે (કલા અને સંસ્કૃતિ); અનુરિતા રાઠોર જાડેજા (મીડિયા); તેમજ ખુશ્બૂ વૈદ્ય અને પરિધી કર્માકર (સ્ટાર્ટઅપ)નો સમાવેશ થાય છે.

વિશેષ સન્માનરૂપે ગાંધીનગર (ઉત્તર) ધારાસભ્ય રીટાબેન પટેલને ગૌરવ ગેલેરી સન્માન આપવામાં આવ્યું, જ્યારે 95 વર્ષના હંસાબેન હર્ષદભાઈ પટેલ અને ડૉ. મીનાક્ષી ઠાકરને આજીવન સિદ્ધિ સન્માનથી નવાજવામાં આવ્યા.

ઉદગમ ટ્રસ્ટના મેનેજિંગ ટ્રસ્ટી ડૉ. મયુર જોશીએ જણાવ્યું કે, “ઉદગમ ઉષા પર્વ 2026 માત્ર સન્માન પૂરતું નથી, પરંતુ આર્થિક તકો સર્જવાનો પણ એક પ્રયાસ છે. 2010થી અત્યાર સુધી 550થી વધુ મહિલા સિદ્ધિ પ્રાપ્તીઓને ફંડિંગ, માર્ગદર્શન અને નેટવર્કિંગ સાથે જોડવામાં આવ્યા છે.”

એવોર્ડ સમારોહના મુખ્ય મેહમાન રીટાબેન પટેલ જણાવ્યું હતું.મહિલાઓ તમામ ક્ષેત્રોમાં અદ્વિતીય યોગદાન આપી રહી છે. ભારતના વડાપ્રધાન નરેન્દ્ર મોદીના નેતૃત્વમાં ભારતમાં મહિલાઓ માટે વિવિધ યોજનાના માધ્યમથી વધુ તકો આપવામાં આવી રહી છે જેનો મહિલાઓ મહત્તમ ઉપયોગ કરી રહી છે. હું ઉદગમ વુમન એચિવર્સ એવોર્ડના તમામ એવોર્ડીઓને અભિનંદન આપીને મહિલા સિદ્ધિઓનું સન્માનકરવા બદલ ઉદગમ ટ્રસ્ટની પણ પ્રશંસા કરતાં અભિનંદન પાઠવ્યા હતા.

એવોર્ડ સમારોહ પહેલા “ગ્રાસરૂટથી વૈશ્વિક સ્તર સુધી: મહિલા ઉદ્યોગસાહસિકોની વાસ્તવિક સફર” અને “ગ્રાસરૂટ નવીનતા અને સ્ટાર્ટઅપ માટે નાણાંકીય સહાય કેવી રીતે મેળવવી” જેવા વિષયો પર પેનલ ચર્ચાઓ યોજાઈ. ઉપરાંત ગુજરાત વેન્ચર ફાઇનાન્સ લિમિટેડના મેનેજિંગ ડિરેક્ટર મિહિર જોશી અને બેબી બ્લૂમની મેનેજિંગ ડિરેક્ટર ભૂમિકાબેન પંડ્યા દ્વારા નિષ્ણાત સત્રો પણ યોજાયા.

મંગળવારે યોજાયેલ આ કાર્યક્રમ મહિલાઓને સન્માનિત કરવાના સાથે તેમને સંસ્થાગત માન્યતા, વ્યાવસાયિક વિશ્વસનીયતા અને નેતૃત્વ માટે નવી તકો પ્રદાન કરવાનો પ્રયાસ હતો. આ સાથે જોડાયેલા સ્ટાર્ટઅપ મહોત્સવ દ્વારા આ સન્માનને આર્થિક તકોમાં પરિવર્તિત કરવાનો પણ પ્રયાસ કરવામાં આવ્યો.

દરેક મહિલાની સફર સન્માનને પાત્ર છે એવી માન્યતા સાથે શરૂ કરાયેલા આ એવોર્ડ્સ સાહસ, ધીરજ અને શક્તિની પ્રેરણાદાયક યાત્રાને દર્શાવાનું ભગીરથ કાર્ય કરે છે. 2010માં શરૂઆતથી લઈને અત્યાર સુધી સતત 17 આવૃત્તિઓમાં વિવિધ ક્ષેત્રોમાં કાર્યરત 550થી વધુ મહિલાઓને સન્માનિત કરવામાં આવી છે.

એવોર્ડ વિજેતાઓની પસંદગી માટે જ્યુરી તરીકે પબ્લિક રિલેશન કામપાણી સ્ટિમ્યુલેશન એમડી શૈલેષ ગોયલ, અમદાવાદ મેનેજમેન્ટ એસોસિએશનના એક્ઝિક્યુટિવ ડિરેક્ટર - ઉન્મેષ દીક્ષિત, સામાજિક કાર્યકર્તા રૂપ શાહ, આશા સરવૈયા સલુજા, તથા ડો. ઉદય ત્રિવેદી તથા ડો. નેહા લાલએ વિજેતાઓની પસંદગી કરી હતી. સમગ્ર કાર્યક્રમનું સંચાલન દેવેન્દ્રભાઈ પારેખએ કર્યું હતું.

---------------

હિન્દુસ્થાન સમાચાર / અભિષેક બારડ