- 100 થી વધુ કલાકારોએ વડાપ્રધાન મોદીની જીવનગાથા જીવંત કરી

- 200 થી પણ વધુ ડ્રોનથી નરેન્દ્ર મોદી,ભગવાન શિવ ,રામ ,ઓમ જેવી વિવિધ કૃતિઓ દર્શાવાય

ભરૂચ 13 માર્ચ (હિ.સ.) : અંકલેશ્વર શહેરના આંગણે ‘નમોત્સવ’ કાર્યક્રમ અંતર્ગત એક ભવ્ય સાંસ્કૃતિક અને યાદગાર શોનું આયોજન કરવામાં આવ્યું હતું. આ પ્રસંગે રાજ્યકક્ષાના મંત્રી ઈશ્વરસિંહ પટેલ સહિત પ્રદેશ અને જિલ્લા ભાજપના ઉચ્ચ હોદ્દેદારો તેમજ ઉદ્યોગ જગતના અગ્રણીઓએ ખાસ હાજરી આપી કાર્યક્રમની ગરિમા વધારી હતી. મોટી સંખ્યામાં ઉદ્યોગપતિઓ અને નગરજનોની ઉપસ્થિતિમાં યોજાયેલો આ નમોત્સવ અંકલેશ્વરવાસીઓ માટે એક અવિસ્મરણીય સંભારણું બની રહ્યો હતો.

રાજકીય અને આધ્યાત્મિક મહાનુભાવોનું હાર્દિક સ્વાગત

‘નમોત્સવ’ના આ રૂડા પ્રસંગે રાજ્યકક્ષાના મંત્રી ઈશ્વરસિંહ પટેલ, પ્રદેશ ભાજપ કારોબારી સમિતિના સભ્ય મારુતિસિંહ અટોદરિયા, અને ધારાસભ્ય રિતેશ વસાવા વિશેષ રૂપે ઉપસ્થિત રહ્યા હતા. કાર્યક્રમમાં 1008 મહામંડલેશ્વર રામકુંડ સંત ગંગાદાસ બાપુએ પોતાની દિવ્ય ઉપસ્થિતિ આપી આશીર્વચન પાઠવ્યા હતા.

સહકારી અને ઉદ્યોગ જગતના અગ્રણીઓની પ્રેરક હાજરી

આ ભવ્ય શોમાં દૂધધારા ડેરી ભરૂચના ઘનશ્યામ પટેલ, જિલ્લા ભાજપ પ્રમુખ પ્રકાશ મોદી, મહામંત્રી પરેશ પટેલ અને અંકલેશ્વર ઉદ્યોગ મંડળના પ્રમુખ વિમલ જેઠવા સહિતના અનેક અગ્રણીઓએ હાજર રહી કલાકારોના ઉત્સાહમાં વધારો કર્યો હતો. કાર્યક્રમમાં વિવિધ ક્ષેત્રના અગ્રણીઓની હાજરીએ 'નમોત્સવ'ની ભવ્યતામાં ચાર ચાંદ લગાવી દીધા હતા.

કલાકારોએ જમાવ્યું આકર્ષણ

નમોત્સવ અંતર્ગત યોજાયેલા આ શોમાં વિવિધ કલાકારોએ પોતાની અદભૂત કલા રજૂ કરી હતી. ઉપસ્થિત મહાનુભાવોએ કલાકારોની પ્રસ્તુતિને બિરદાવી હતી અને તેમને પ્રોત્સાહિત કર્યા હતા. મોટી સંખ્યામાં ઉદ્યોગપતિઓ અને નગરજનોની હાજરીથી અંકલેશ્વરનું આંગણું ગુંજી ઉઠ્યું હતું અને આ આખો કાર્યક્રમ શહેરના ઇતિહાસમાં એક યાદગાર સંભારણું બની રહ્યો હતો.

---------------

હિન્દુસ્થાન સમાચાર / અતુલકુમાર પટેલ