મહેસાણા, 16 માર્ચ (હિ.સ.) : રોડ સેફ્ટી અંગે જાગૃતિ ફેલાવવા માટે મહેસાણા આરટીઓ ટીમ દ્વારા ઊંઝા ખાતે આવેલી ઔદ્યોગિક તાલીમ સંસ્થા (આઈટીઆઈ)માં રોડ સેફ્ટી સેમિનારનું આયોજન કરવામાં આવ્યું હતું. આ સેમિનારમાં સંસ્થાના તાલીમાર્થી વિદ્યાર્થીઓને માર્ગ સુરક્ષા સંબંધિત મહત્વપૂર્ણ માહિતી આપવામાં આવી હતી.

કાર્યક્રમ દરમિયાન આરટીઓ ટીમના અધિકારીઓએ વિદ્યાર્થીઓને ટ્રાફિક નિયમોનું પાલન કરવાનું મહત્વ સમજાવ્યું હતું. વાહન ચલાવતી વખતે હેલ્મેટ પહેરવું, સીટ બેલ્ટનો ઉપયોગ કરવો, ઓવર સ્પીડથી બચવું તેમજ મોબાઇલ ફોનનો ઉપયોગ ન કરવો જેવા મુદ્દાઓ અંગે વિસ્તૃત માર્ગદર્શન આપવામાં આવ્યું હતું. માર્ગ અકસ્માતો કેવી રીતે ટાળી શકાય અને જવાબદાર નાગરિક તરીકે ટ્રાફિક નિયમોનું પાલન કરવું કેટલું જરૂરી છે તે અંગે પણ સમજાવવામાં આવ્યું હતું.

આ ઉપરાંત વિદ્યાર્થીઓમાં જાગૃતિ વધે તે માટે આરટીઓ ટીમ દ્વારા રોડ સેફ્ટી સંબંધિત માહિતી આપતા પેમ્ફલેટનું પણ વિતરણ કરવામાં આવ્યું હતું. વિદ્યાર્થીઓએ આ સેમિનારમાં રસપૂર્વક ભાગ લઈ માર્ગ સુરક્ષા અંગેના નિયમોને જીવનમાં અમલમાં મૂકવાની પ્રતિબદ્ધતા વ્યક્ત કરી હતી.

આ કાર્યક્રમનો મુખ્ય હેતુ યુવાનોમાં રોડ સેફ્ટી અંગે જાગૃતિ લાવી માર્ગ અકસ્માતોની સંખ્યા ઘટાડવાનો હતો.

---------------

હિન્દુસ્થાન સમાચાર / RINKU AMITKUMAR THAKOR