સુરત, 17 માર્ચ (હિ.સ.): સુરતના સચિન વિસ્તારમાં ગેરકાયદે ગેસ રિફિલિંગનો ભંડાફોડ થયો છે. પોલીસને મળેલી ગુપ્ત માહિતીના આધારે જુદા-જુદા સ્થળોએ દરોડા પાડવામાં આવ્યા હતા, જ્યાં રહેણાંક અને દુકાન વિસ્તારમાં જોખમી રીતે ગેસ ભરવાનું કામ ચાલી રહ્યું હતું. આ કાર્યવાહી દરમિયાન ત્રણ શખ્સોને ઝડપી લેવામાં આવ્યા છે.

તપાસ દરમિયાન ખુલ્યું કે આરોપીઓ ઘરેલું ગેસ સિલિન્ડરમાંથી નાની બોટલોમાં ગેસ ભરતા હતા. આ માટે તેઓ પાઇપ અને ખાસ વાલ્વનો ઉપયોગ કરતા હતા, પરંતુ કોઈ સુરક્ષા વ્યવસ્થા વગર આ કામગીરી ચાલતી હતી. આવી રીતથી ગેસ ટ્રાન્સફર કરવું અત્યંત જોખમી હોવાથી મોટી દુર્ઘટના સર્જાઈ શકે તેમ હતું.

પોલીસે જણાવ્યું કે આરોપીઓ સબસિડીવાળા ગેસને સસ્તામાં મેળવી તેને ગેરકાયદેસર રીતે નાની બોટલોમાં ભરી મોંઘા ભાવે વેચતા હતા. પોતાના ફાયદા માટે તેઓએ આસપાસના રહેવાસીઓના જીવને જોખમમાં મૂક્યા હતા. સમયસર કાર્યવાહી થતાં સંભવિત દુર્ઘટના ટળી હોવાનું માનવામાં આવે છે.

આ મામલે ત્રણેય આરોપીઓ સામે કાયદેસરની કાર્યવાહી હાથ ધરાઈ છે અને વિવિધ કલમો હેઠળ ગુના નોંધાયા છે. પોલીસ હવે આ રેકેટ પાછળ અન્ય કોઈ મોટું નેટવર્ક જોડાયેલું છે કે નહીં તેની તપાસ કરી રહી છે અને ભવિષ્યમાં આવી પ્રવૃત્તિઓ સામે કડક પગલાં ભરવાની ચેતવણી આપી છે.

---------------

હિન્દુસ્થાન સમાચાર / યજુવેન્દ્ર દુબે