બોટાદ,19 માર્ચ (હિ.સ.)બોટાદ જિલ્લામાં વિકાસના નવા આયામોને સ્પર્શતી વધુ એક મહત્વપૂર્ણ પહેલ અંતર્ગત બરવાળા તાલુકામાં તાલુકા પંચાયત કચેરીના રીનોવેશન કાર્ય પૂર્ણ થતા તેનું લોકાર્પણ કરવામાં આવ્યું હતું. જિલ્લા વિકાસ અધિકારીશ્રી અક્ષય બુડાનીયાના હસ્તે રૂ.૩૦ લાખના ખર્ચે સુધારાયેલી આ કચેરીનું વિધિવત ઉદ્ઘાટન કરવામાં આવ્યું હતું. તાલુકા પંચાયત જેવી મહત્વપૂર્ણ કચેરીઓમાં સુવિધાઓનો વિકાસ થવાથી નાગરિકોને વધુ સગવડભર્યો અને ઝડપી સેવા લાભ મળી શકે છે. આ રીનોવેશન કાર્યથી કચેરીનું આધુનિકીકરણ થયું છે, જેનાથી કર્મચારીઓ માટે કાર્યપરિસ્થિતિ વધુ અનુકૂળ બનશે તેમજ લોકોના પ્રશ્નોનું સમયસર નિરાકરણ લાવવામાં સહાય મળશે.

કાર્યક્રમ દરમિયાન બરવાળા તાલુકા પંચાયત પ્રમુખશ્રી, જિલ્લા ગ્રામ વિકાસ એજન્સીના નિયામકશ્રી, પ્રાંત અધિકારીશ્રી, નાયબ જિલ્લા વિકાસ અધિકારીશ્રી, તાલુકા વિકાસ અધિકારીશ્રી, કાર્યપાલક ઇજનેરશ્રી અને નાયબ કાર્યપાલક ઇજનેરશ્રી સહિતના અધિકારીઓ ઉપસ્થિત રહ્યા હતા. આ ઉપરાંત તાલુકા પંચાયતના પદાધિકારીઓ અને સભ્યો પણ મોટી સંખ્યામાં હાજર રહ્યા હતા, જે કાર્યક્રમને વિશેષ ગૌરવ આપતું હતું.

કચેરીના રીનોવેશન અંતર્ગત ઇમારતની અંદર તથા બહાર સુધારણા સાથે આધુનિક સુવિધાઓ ઉમેરવામાં આવી છે. નાગરિકોને સરળતાથી સેવા મળી રહે તે માટે કચેરીમાં જરૂરી વ્યવસ્થાઓને પ્રાથમિકતા આપવામાં આવી છે. આ કામગીરીથી તાલુકા સ્તરે શાસનવ્યવસ્થામાં વધુ પારદર્શિતા અને કાર્યક્ષમતા વધવાની અપેક્ષા વ્યક્ત કરવામાં આવી છે.

આ લોકાર્પણ કાર્યક્રમ સાથે બરવાળા તાલુકામાં વિકાસના કાર્યને નવી દિશા મળી છે. સ્થાનિક નાગરિકોમાં પણ આ નવીન સુવિધાઓને લઈને ખુશીનો માહોલ જોવા મળ્યો હતો. આવનારા સમયમાં પણ આવા વિકાસ કાર્યો દ્વારા ગ્રામ્ય વિસ્તારોમાં સુવિધાઓનો વ્યાપ વધારવા માટે તંત્ર પ્રતિબદ્ધ છે.

---------------

હિન્દુસ્થાન સમાચાર / GONDALIYA DISHANT