બોટાદ, 22 માર્ચ (હિ.સ.)બોટાદ જિલ્લામાં રમતગમતને પ્રોત્સાહન આપવા માટે પાયોનીયર એકેડેમી, બોટાદ દ્વારા 25 કિલોમીટર લાંબી સ્કેટિંગ મેરેથોનનું સફળ આયોજન કરવામાં આવ્યું હતું. આ મેરેથોન બોટાદ શહેરમાંથી પ્રારંભ થઈ ગઢડા ખાતે આવેલા પ્રખ્યાત ગોપીનાથજી મંદિરે પૂર્ણ થઈ હતી. સમગ્ર કાર્યક્રમમાં જિલ્લા ભરના યુવાનો અને ખેલાડીઓએ ઉત્સાહભેર ભાગ લીધો હતો.

મેરેથોનની શરૂઆત સવારે કરવામાં આવી હતી, જ્યાં ભાગ લેનાર ખેલાડીઓમાં ખાસ ઉત્સાહ અને જિજ્ઞાસા જોવા મળી હતી. નાના બાળકો થી લઈ યુવાનો સુધીના સ્કેટર્સે આ લાંબી દોડમાં ભાગ લઈને પોતાની ક્ષમતા અને રમતગમત પ્રત્યેની લગન દર્શાવી હતી. 25 કિલોમીટરનું અંતર પાર કરવું ખેલાડીઓ માટે એક પડકારરૂપ હતું, છતાં તમામે હિંમત અને ધૈર્ય સાથે મેરેથોન પૂર્ણ કરી હતી.

આ સમગ્ર કાર્યક્રમ દરમિયાન બોટાદ અને ગઢડા પોલીસ દ્વારા કડક સુરક્ષા વ્યવસ્થા ગોઠવવામાં આવી હતી. માર્ગ પર સતત પેટ્રોલિંગ કરવામાં આવ્યું હતું જેથી કોઈપણ પ્રકારની અનિચ્છનીય ઘટના ન બને. સાથે જ મેડિકલ ટીમ પણ સ્ટેન્ડબાય રાખવામાં આવી હતી જેથી ખેલાડીઓને જરૂર પડે ત્યારે તરત સારવાર મળી શકે.

મેરેથોન ગઢડાના ગોપીનાથજી મંદિરે પૂર્ણ થતાં ત્યાં સમાપન સમારોહ યોજાયો હતો. આ પ્રસંગે વિજેતા ખેલાડીઓને ટ્રોફી અને પ્રમાણપત્ર આપી સન્માનિત કરવામાં આવ્યા હતા. સાથે જ ભાગ લેનાર તમામ ખેલાડીઓને પણ પ્રોત્સાહન રૂપે સર્ટિફિકેટ આપવામાં આવ્યા હતા.

આ મેરેથોન દ્વારા જિલ્લામાં રમતગમત પ્રત્યે જાગૃતિ ફેલાવવાનો એક સરાહનીય પ્રયાસ કરવામાં આવ્યો હતો. આવા આયોજનો યુવાનોને સ્વસ્થ જીવનશૈલી તરફ પ્રેરણા આપે છે તેમજ તેઓમાં આત્મવિશ્વાસ અને શિસ્તનું નિર્માણ કરે છે. પાયોનીયર એકેડેમી દ્વારા કરવામાં આવેલ આ પહેલને જિલ્લામાં વ્યાપક પ્રતિસાદ મળ્યો હતો અને ભવિષ્યમાં પણ આવા કાર્યક્રમો યોજાશે તેવી આશા વ્યક્ત કરવામાં આવી હતી.

---------------

હિન્દુસ્થાન સમાચાર / GONDALIYA DISHANT