ભાવનગર, 22 માર્ચ (હિ.સ.) : ભાવનગર શહેરમાં Academy of Pediatrics Welfare, Bhavnagar દ્વારા શહેરના તમામ પીડિયાટ્રિક ડૉક્ટરો માટે સાયબર અવેરનેસ સેમિનારનું આયોજન કરવામાં આવ્યું હતું. આ સેમિનારમાં મેડિકલ ક્ષેત્રના નિષ્ણાતોને હાલ વધતા જતા સાયબર ક્રાઈમના બનાવો અંગે જાગૃતિ ફેલાવવા સાથે સોશિયલ મીડિયા સુરક્ષા અંગે વિસ્તૃત માર્ગદર્શન આપવામાં આવ્યું હતું.આજના ડિજિટલ યુગમાં ડૉક્ટરો અને હોસ્પિટલ સ્ટાફ માટે સાયબર સુરક્ષા અત્યંત મહત્વપૂર્ણ બની ગઈ છે. દર્દીઓની વ્યક્તિગત માહિતી, મેડિકલ રેકોર્ડ્સ અને ઑનલાઇન કન્સલ્ટેશન જેવી સેવાઓને કારણે ડેટા સુરક્ષા જાળવવી અનિવાર્ય બની છે.

સેમિનારમાં નિષ્ણાતોએ સમજાવ્યું કે ફિશિંગ, હેકિંગ, ડેટા લીક અને ફેક પ્રોફાઇલ જેવા સાયબર ગુનાઓ દિવસેને દિવસે વધી રહ્યા છે, જેને ધ્યાનમાં રાખીને સાવચેતી રાખવી જરૂરી છે.કાર્યક્રમ દરમિયાન ડૉક્ટરોને મજબૂત પાસવર્ડ બનાવવાની રીત, ટૂ-ફેક્ટર ઓથેન્ટિકેશનનો ઉપયોગ, શંકાસ્પદ લિંક્સથી દૂર રહેવાની જરૂરિયાત અને સોશિયલ મીડિયા પ્લેટફોર્મ્સ પર પ્રાઈવસી સેટિંગ્સને સચોટ રીતે સેટ કરવાની માહિતી આપવામાં આવી હતી. સાથે જ દર્દીઓની માહિતી શેર કરતી વખતે કાનૂની બાબતો અને નૈતિક જવાબદારીઓ વિશે પણ માર્ગદર્શન આપવામાં આવ્યું. હાલના સમયમાં મેડિકલ પ્રોફેશન સાથે જોડાયેલા સાયબર જોખમો અંગે ચર્ચા કરી. આ પ્રકારના કાર્યક્રમો દ્વારા ડૉક્ટરોમાં જાગૃતિ વધે છે અને તેઓ પોતાની તેમજ દર્દીઓની માહિતી વધુ સુરક્ષિત રાખી શકે છે.અંતમાં આયોજક સંસ્થાએ જણાવ્યું કે ભવિષ્યમાં પણ આવા જાગૃતિ કાર્યક્રમોનું આયોજન કરવામાં આવશે, જેથી મેડિકલ ક્ષેત્ર વધુ સુરક્ષિત અને સજાગ બની શકે. આ સેમિનાર ભાવનગર શહેરના પીડિયાટ્રિક ડૉક્ટરો માટે ખૂબ જ ઉપયોગી સાબિત થયો હતો.

---------------

હિન્દુસ્થાન સમાચાર / GONDALIYA DISHANT