નવસારી, 24 માર્ચ (હિ.સ.): નવસારી જિલ્લાના આરક સિસોદ્રા ગામ નજીક આજે વહેલી સવારે એક ખાનગી લક્ઝરી બસને અકસ્માત નડ્યો હતો. મુંબઈથી અમદાવાદ તરફ જઈ રહેલી બસ સામેથી અચાનક આવેલા વાહનને બચાવવાના પ્રયાસમાં નિયંત્રણ ગુમાવતા ડિવાઈડર પર ચડી ગઈ અને પલટી ગઈ. ઘટનામાં પાંચ મુસાફરોને ઈજાઓ પહોંચી હતી.

માહિતી મુજબ, બસમાં અનેક મુસાફરો મુસાફરી કરી રહ્યા હતા. કટ પાસે પહોંચતા સામે આવતા વાહનને ટાળવા ડ્રાઈવરે ઝડપમાં વાળો લીધો, પરંતુ બસનો સંતુલન બગડતાં અકસ્માત સર્જાયો. અકસ્માત બાદ બસ રોડ પર પલટી હાલતમાં જોવા મળી હતી.

ઘટનાની જાણ થતાં જ સ્થાનિક લોકો અને અન્ય વાહનચાલકો તરત જ મદદ માટે પહોંચ્યા હતા. નવસારી ગ્રામ્ય પોલીસ પણ ઘટના સ્થળે દોડી આવી અને રાહત કામગીરી હાથ ધરી હતી. ઈજાગ્રસ્તોને નજીકની હોસ્પિટલમાં સારવાર માટે ખસેડવામાં આવ્યા હતા, જ્યારે અન્ય મુસાફરોને સુરક્ષિત રીતે બહાર કાઢવામાં આવ્યા હતા.

આ વિસ્તાર અગાઉથી અકસ્માતપ્રવણ ગણાય છે અને સ્થાનિકો તેને બ્લેક સ્પોટ તરીકે ઓળખાવે છે. વારંવાર થતા અકસ્માતોને કારણે ગ્રામજનોએ અહીં ઓવરબ્રિજ બનાવવાની માંગ અનેકવાર ઉઠાવી છે, પરંતુ હજી સુધી કોઈ કાયમી ઉકેલ આવ્યો નથી, જેના કારણે લોકોમાં ચિંતા વધી રહી છે.

---------------

હિન્દુસ્થાન સમાચાર / યજુવેન્દ્ર દુબે