બોટાદ, 30 માર્ચ (હિ.સ.) : બોટાદ શહેરમાં પર્યાવરણ અને પક્ષી સંરક્ષણ માટે એક સરાહનીય પહેલ તરીકે જાયન્ટ્સ ગ્રુપ ઓફ બોટાદ દ્વારા ચકલીના માળા તેમજ પાણીના કુંડાનું વિતરણ કરવામાં આવ્યું હતું. ઉનાળાની કઠોર ગરમીને ધ્યાનમાં રાખીને પક્ષીઓને પાણી અને આશરો મળી રહે તે હેતુથી આ કાર્યક્રમનું આયોજન કરવામાં આવ્યું હતું.
આ અભિયાન અંતર્ગત શહેરના વિવિધ વિસ્તારોમાં રહેવાસીઓ, વેપારીઓ તેમજ સમાજસેવી સંસ્થાઓને ચકલીના માળા અને પાણીના કુંડાઓ વિતરણ કરવામાં આવ્યા હતા. ગ્રુપના સભ્યોએ લોકોને પોતાના ઘરની બાલ્કની, ઓટલા કે વૃક્ષો પર આ માળા બાંધી ચકલી સહિત અન્ય નાના પક્ષીઓને સુરક્ષિત વસવાટ માટે પ્રોત્સાહિત કર્યા હતા. સાથે જ પાણીના કુંડામાં નિયમિત પાણી ભરવાનું મહત્વ પણ સમજાવ્યું હતું.
જાયન્ટ્સ ગ્રુપ દ્વારા જણાવાયું હતું કે ઉનાળાની ઋતુમાં તાપમાન વધતા પક્ષીઓ માટે પાણી અને આશરો મળવો મુશ્કેલ બની જાય છે. આવા સમયમાં માનવ સમાજ દ્વારા થોડી કાળજી લેવામાં આવે તો અનેક પક્ષીઓનું જીવન બચાવી શકાય છે. આ અભિયાનનો મુખ્ય ઉદ્દેશ લોકોમાં પર્યાવરણ પ્રત્યે જાગૃતિ લાવવાનો અને જીવદયા જેવી માનવતાવાદી ભાવનાને પ્રોત્સાહન આપવાનો હતો.આ કાર્યક્રમમાં શહેરના નાગરિકોએ ઉત્સાહભેર ભાગ લીધો હતો અને આ પહેલને વખાણી હતી. ઘણા લોકોએ પોતાના ઘર અને આસપાસના વિસ્તારોમાં માળા અને કુંડાઓ સ્થાપિત કરવાની પ્રતિબદ્ધતા વ્યક્ત કરી હતી.
જાયન્ટ્સ ગ્રુપ દ્વારા અગાઉ પણ આવા સામાજિક અને પર્યાવરણલક્ષી કાર્યક્રમો યોજાતા રહ્યા છે અને ભવિષ્યમાં પણ આ પ્રકારની પ્રવૃત્તિઓ ચાલુ રાખવાની ખાતરી આપવામાં આવી છે. આ પ્રકારની પહેલોથી માત્ર પક્ષીઓનું જ સંરક્ષણ નહીં પરંતુ સમાજમાં પર્યાવરણ પ્રત્યેની જવાબદારીની ભાવનાનો વિકાસ થાય છે.
---------------
હિન્દુસ્થાન સમાચાર / GONDALIYA DISHANT
