બોટાદ, 31 માર્ચ (હિ.સ.) : સાળંગપુર ખાતે દર્શનાર્થે આવેલા એક 60 વર્ષીય વૃદ્ધ માજી પોતાના પરિવારથી વિખૂટા પડી જતા ચિંતાજનક પરિસ્થિતિ સર્જાઈ હતી. આવી સ્થિતિમાં બોટાદની 181 અભયમ્ મહિલા હેલ્પલાઇન ટીમે સમયસર કાર્યવાહી કરીને માનવતાનું સુંદર ઉદાહરણ પૂરું પાડ્યું અને વૃદ્ધને સુરક્ષિત રીતે તેમના પરિવાર સાથે ફરી મળાવ્યા.પ્રાપ્ત માહિતી મુજબ, વૃદ્ધ માજી પોતાના પરિવાર સાથે સાળંગપુર મંદિર ખાતે દર્શન કરવા આવ્યા હતા. ભારે ભીડને કારણે તેઓ પરિવારના સભ્યો થી અલગ પડી ગયા હતા. અજાણી જગ્યાએ એકલા પડી જતા તેઓ ગભરાઈ ગયા હતા અને કોઈ ઓળખાણ કે સંપર્ક ન હોવાથી મુશ્કેલીમાં મુકાયા હતા.આ દરમિયાન સ્થાનિક લોકોએ પરિસ્થિતિને સમજતા 181 અભયમ્ ટીમને જાણ કરી હતી. માહિતી મળતા જ ટીમ તરત જ ઘટનાસ્થળે પહોંચી ગઈ અને વૃદ્ધને શાંતિ આપી તેમની માહિતી મેળવવાનો પ્રયાસ કર્યો. શરૂઆતમાં તેઓ ગભરાયેલા હોવાથી યોગ્ય માહિતી આપી શકતા નહોતા, પરંતુ ટીમે ધીરજ અને સંવેદનશીલતાથી વાતચીત કરી જરૂરી વિગતો મેળવી.ટીમ દ્વારા પ્રાપ્ત માહિતીના આધારે પરિવારજનોને શોધવાની કામગીરી હાથ ધરવામાં આવી. થોડા સમયની શોધખોળ બાદ વૃદ્ધના પરિવારજનોનો સંપર્ક સાધવામાં સફળતા મળી. ત્યારબાદ ટીમે વૃદ્ધને સુરક્ષિત રીતે તેમના પરિવારજનોને સોંપ્યા.પરિવારજનો પોતાના સભ્યને ફરી મળતા ખૂબ જ ભાવુક બની ગયા હતા અને 181 અભયમ્ ટીમનો આભાર વ્યક્ત કર્યો હતો.

આ ઘટનાએ ફરી એકવાર સાબિત કર્યું કે 181 અભયમ્ સેવા માત્ર મહિલાઓ માટે જ નહીં, પરંતુ જરૂરિયાતમંદ દરેક નાગરિક માટે મદદરૂપ બની રહી છે.બોટાદ 181 અભયમ્ ટીમનો આ કાર્ય માનવતાની સુગંધ ફેલાવતો છે અને સમાજ માટે પ્રેરણારૂપ બની રહ્યો છે.

---------------

હિન્દુસ્થાન સમાચાર / GONDALIYA DISHANT