વલસાડ, 30 માર્ચ (હિ.સ.): વલસાડ જિલ્લામાં પોલીસ દ્વારા ‘ઓપરેશન વાઈન ક્લીન’ હેઠળ મોટા પાયે કાર્યવાહી હાથ ધરવામાં આવી હતી, જેમાં આશરે ₹6.50 કરોડથી વધુ કિંમતનો વિદેશી દારૂ નષ્ટ કરવામાં આવ્યો. જાન્યુઆરીથી ફેબ્રુઆરી દરમિયાન વિવિધ પોલીસ સ્ટેશનો દ્વારા જપ્ત કરાયેલા દારૂના જથ્થાને એકત્રિત કરીને સોમવારે બુલડોઝરથી નાશ કરવામાં આવ્યો હતો.

જિલ્લાના વલસાડ સિટી, રૂરલ અને ડુંગરી સહિતના પોલીસ મથકોમાંથી જપ્ત થયેલો દારૂ એક નિર્ધારિત સ્થળે લાવીને નિકાલ કરવામાં આવ્યો. માત્ર ત્રણ પોલીસ મથકોમાંથી જ લગભગ ₹1.99 કરોડના દારૂનો જથ્થો નષ્ટ થયો હોવાનું જણાવાયું છે.

આ સમગ્ર પ્રક્રિયા કોર્ટની મંજૂરી મેળવ્યા બાદ કરવામાં આવી હતી. જિલ્લા પોલીસ વડા યુવરાજસિંહ જાડેજાના માર્ગદર્શન હેઠળ તમામ પોલીસ મથકોને જપ્ત માલના નિકાલ માટે કાનૂની મંજૂરી લેવા સૂચના આપવામાં આવી હતી. ત્યારબાદ વહીવટી તંત્ર અને પોલીસની સંયુક્ત દેખરેખ હેઠળ કાર્યવાહી પારદર્શક રીતે પૂર્ણ થઈ.

આ પ્રસંગે પોલીસ દ્વારા સ્પષ્ટ કરવામાં આવ્યું કે દારૂબંધીના કાયદાનો ભંગ કરનારા સામે કડક પગલાં લેવામાં આવશે. આ કાર્યવાહીથી ગેરકાયદેસર પ્રવૃત્તિઓમાં સંકળાયેલા તત્વોને ચેતવણી મળી છે અને કાયદાની અમલવારી વધુ મજબૂત બનવાની આશા વ્યક્ત કરવામાં આવી છે.

---------------

હિન્દુસ્થાન સમાચાર / યજુવેન્દ્ર દુબે