- કોક્લીઅર ઈમ્પ્લાન્ટ મેળવનાર બાળકો સાથે વિશેષ સંવાદ યોજાયો.

ગાંધીનગર, 04 માર્ચ (હિ.સ.) : ગાંધીનગર સ્થિત GMERS મેડિકલ કોલેજ સંલગ્ન સિવિલ હોસ્પિટલના ઈ.એન.ટી. (ENT) વિભાગ દ્વારા 'વર્લ્ડ હિયરિંગ ડે' (વિશ્વ શ્રવણ દિવસ) ની ઉત્સાહભેર ઉજવણી કરવામાં આવી હતી. આ અવસરે હોસ્પિટલમાં સફળતાપૂર્વક કોક્લીઅર ઈમ્પ્લાન્ટ ઓપરેશન કરાવનાર બાળકો અને તેમના વાલીઓ માટે એક વિશેષ માર્ગદર્શન અને ફોલો-અપ કાર્યક્રમનું આયોજન કરવામાં આવ્યું હતું.

આ અવસરે વિભાગના પ્રાધ્યાપક અને વડા ડૉ. યોગેશ ગજ્જર તથા તેમની તબીબી ટીમ દ્વારા લાભાર્થી બાળકો અને તેમના માતા-પિતા સાથે સીધો સંવાદ કરવામાં આવ્યો હતો. આ બેઠકમાં ઈમ્પ્લાન્ટની લાંબા ગાળાની જાળવણી અને સારસંભાળ કેવી રીતે રાખવી, તે અંગે વિસ્તૃત સમજૂતી આપવામાં આવી હતી. તદુપરાંત, ઓપરેશન બાદ બાળકની પ્રગતિ અને 'ઓડિયો વર્બલ થેરાપી' (AVT) ના પરિણામોની સમીક્ષા કરવામાં આવી હતી. વાલીઓને પડતી મુશ્કેલીઓ સાંભળીને સ્થળ પર જ તેનું યોગ્ય નિરાકરણ લાવવામાં આવ્યું હતું.

તબીબી અધીક્ષકની ઉપસ્થિતિ

આ કાર્યક્રમમાં ગાંધીનગર સિવિલ હોસ્પિટલના તબીબી અધીક્ષક ડૉ. મીતા પરીખ ખાસ ઉપસ્થિત રહ્યા હતા. તેમણે દરેક લાભાર્થી બાળક સાથે વ્યક્તિગત વાર્તાલાપ કર્યો હતો અને ઓપરેશન બાદ બાળકની વાચા કેટલી ખુલી છે તથા તે કેટલું સ્પષ્ટ બોલી શકે છે, તે અંગે જાતે પૂછપરછ કરી સંતોષ વ્યક્ત કર્યો હતો.

ઉલ્લેખનીય છે કે, જન્મજાત સાંભળવાની ખામી ધરાવતા બાળકો માટે કોક્લીઅર ઈમ્પ્લાન્ટ એક આશીર્વાદ સમાન સાબિત થઈ રહ્યું છે. સિવિલ હોસ્પિટલના આ સફળ પ્રયાસોને કારણે અનેક બાળકો આજે સામાન્ય જીવન જીવતા થયા છે અને બોલતા-સાંભળતા થયા છે.

---------------

હિન્દુસ્થાન સમાચાર / અભિષેક બારડ