વાપી , 10 એપ્રિલ (હિ.સ.) વાપી મહાનગરપાલિકાની ચૂંટણીને ધ્યાનમાં રાખીને ભારતીય જનતા પાર્ટીએ તમામ 13 વોર્ડ માટે કુલ 52 ઉમેદવારોની યાદી જાહેર કરી છે. ગુજરાત પ્રદેશ ચૂંટણી સમિતિની બેઠક બાદ આ યાદીને અંતિમ મંજૂરી આપવામાં આવી હતી.

આ વખતની ઉમેદવાર યાદી ખાસ કરીને હાઇકમાન્ડના નિર્દેશોને ધ્યાનમાં રાખીને તૈયાર કરવામાં આવી હોવાનું સૂત્રો જણાવી રહ્યા છે. પાર્ટી દ્વારા અગાઉથી જ નક્કી કરવામાં આવ્યું હતું કે સતત ત્રણ ટર્મ પૂર્ણ કરનારા તેમજ 60 વર્ષથી વધુ વય ધરાવતા નેતાઓને ટિકિટ આપવામાં નહીં આવે.

આ નિયમોના કારણે અનેક અનુભવી અને જૂના ચહેરાઓના નામ યાદીમાંથી કપાઈ ગયા છે, જેના કારણે રાજકીય વર્તુળોમાં ચર્ચા તેજ બની છે. બીજી તરફ, ભાજપે યુવા ચહેરાઓ અને નવા કાર્યકરોને મોટી સંખ્યામાં તક આપી છે, જેનાથી પાર્ટી નવા નેતૃત્વને આગળ લાવવાનો પ્રયાસ કરી રહી હોવાનું માનવામાં આવે છે.

દરેક વોર્ડમાં ચાર ઉમેદવારો મુકીને કુલ 52 ઉમેદવારોને મેદાનમાં ઉતારવામાં આવ્યા છે. ઉમેદવારોની પસંદગીમાં જીતવાની ક્ષમતા, સ્થાનિક સમીકરણો અને સંગઠન પ્રત્યેની વફાદારીને મહત્વ આપવામાં આવ્યું હોવાનું કહેવાય છે.

પરંતુ, ટિકિટ વિતરણમાં થયેલા મોટા ફેરફારોને કારણે કેટલાક દાવેદારોમાં અસંતોષ પણ સામે આવી રહ્યો છે. કેટલાક વિસ્તારોમાં અંદરખાને વિરોધની ચર્ચા પણ ચાલી રહી છે, જેને કાબૂમાં રાખવું પાર્ટી માટે પડકારરૂપ બની શકે છે.

યાદી જાહેર થતાં જ વાપી શહેરમાં ચૂંટણીનું રાજકીય વાતાવરણ ગરમાયું છે અને હવે તમામ ઉમેદવારો પ્રચાર માટે સક્રિય બની ગયા છે. ભાજપ આ વખતે વિકાસના મુદ્દા અને સંગઠન શક્તિના આધારે જીતનો વિશ્વાસ વ્યક્ત કરી રહી છે.

---------------

હિન્દુસ્થાન સમાચાર / Krishna Ghanshyam Jha