કચ્છ, 13 એપ્રિલ (હિ.સ.) : ભચાઉ પોલીસ સ્ટેશન વિસ્તારમાં નોંધાયેલા પોક્સો કાયદા હેઠળના ગંભીર ગુનામાં પોલીસ દ્વારા ઝડપી અને અસરકારક કામગીરી હાથ ધરવામાં આવી છે. ઘટનાની જાણ થતાં જ પોલીસ તંત્ર સતર્ક બન્યું અને ગણતરીના દિવસોમાં જ મુખ્ય આરોપીને ઝડપી પાડવામાં સફળતા મેળવી છે.

તા. 12 માર્ચ 2026ના રોજ ભચાઉ પોલીસ સ્ટેશનમાં ગુનો નં. 11993004260247/2026 તરીકે ભારતીય ન્યાય સંહિતા 2023ની કલમ 137(2) હેઠળ ફરિયાદ નોંધાઈ હતી. આ ગંભીર મામલે ભચાઉ પોલીસ સ્ટેશનના પોલીસ ઇન્સ્પેક્ટર શ્રી ડી.ડી. ઝાલાના માર્ગદર્શન હેઠળ તાત્કાલિક તપાસ હાથ ધરવામાં આવી હતી.

તપાસ દરમિયાન પોલીસ દ્વારા હ્યુમન ઇન્ટેલિજન્સ તેમજ ટેકનિકલ સર્વેલન્સનો ઉપયોગ કરીને આરોપીની હિલચાલ પર નજર રાખવામાં આવી. સુચિત અને સચોટ માહિતીના આધારે પોલીસે મુખ્ય આરોપી રમેશ પરબત કોલી (ઉંમર 23 વર્ષ), હાલ મહેશનગર સોસાયટી, મુંદ્રા તથા મૂળ રહેવાસી ખાનપર (તા. રાપર, કચ્છ)ને ઝડપી પાડી કાયદેસરની કાર્યવાહી હાથ ધરી છે.

આ કેસમાં ભારતીય ન્યાય સંહિતાની કલમ 137(2), 87, 64(2)(i), 64(2)(m), 351(3), 54 તેમજ પોક્સો એક્ટની કલમ 3(a), 4(1), 5(l), 6, 17 અને 18 મુજબ ગુનો નોંધાયો છે, જે ગુનાની ગંભીરતાને દર્શાવે છે.

આ સમગ્ર કામગીરી ભચાઉ પોલીસ સ્ટેશનના પોલીસ ઇન્સ્પેક્ટર તથા સર્વેલન્સ સ્ટાફની સંકલિત મહેનતથી સફળ બની છે. પોલીસના ઝડપી પ્રતિસાદને કારણે આરોપીને ઝડપથી કાબૂમાં લેવામાં આવ્યો છે, જેનાથી કાયદો અને વ્યવસ્થામાં લોકોનો વિશ્વાસ વધુ મજબૂત બન્યો છે.

સ્થાનિક લોકો દ્વારા પણ પોલીસની કામગીરીની પ્રશંસા કરવામાં આવી રહી છે, અને આવા ગંભીર ગુનાઓ સામે કડક કાર્યવાહી થવી જોઈએ તેવી માંગ ઉઠી રહી છે.

---------------

હિન્દુસ્થાન સમાચાર / Rohit R. Padhiyar