ભાવનગર, 14 એપ્રિલ (હિ.સ.)ભાવનગર શહેરમાં કાયદો અને વ્યવસ્થાની જાળવણી માટે સતત પેટ્રોલિંગ કરી રહેલી લોકલ ક્રાઇમ બ્રાન્ચ (એલ.સી.બી.) દ્વારા જુગારના એક વધુ કેસનો પર્દાફાશ કરવામાં આવ્યો છે. ઘોઘારોડ વિસ્તારમાં જાહેરમાં ગંજીપત્તાના પાનાં વડે હાથકાંપનો જુગાર રમતા છ ઈસમોને પોલીસે ઝડપી પાડ્યા છે અને તેમની પાસેથી રોકડ રૂ.૨૪,૨૬૦ સહિતનો મુદ્દામાલ કબ્જે કર્યો છે.મળતી માહિતી મુજબ, એલ.સી.બી. પોલીસ સ્ટાફના કર્મચારીઓ ભાવનગર શહેર વિસ્તારમાં નાઈટ રાઉન્ડ પેટ્રોલિંગમાં હતા. તે દરમિયાન તેમને બાતમી મળી હતી કે ઘોઘારોડ પર શીતળામાતા મંદિર સામે, ચાઈનાનગર નજીક નાના ખીજડાવાળા મામાના મંદિર પાસે કેટલાક ઈસમો જાહેરમાં લાઈટના અજવાળે ગંજીપત્તાના પાનાં વડે હારજીતનો હાથકાંપનો જુગાર રમી રહ્યા છે. બાતમીના આધારે પોલીસે તાત્કાલિક સ્થળ પર દરોડો પાડ્યો હતો.પોલીસના દરોડા દરમિયાન છ ઈસમો જુગાર રમતા રંગેહાથ ઝડપાઈ ગયા હતા. પોલીસે તેમની ઓળખ કાંતિભાઈ અમરાભાઈ ડાભી, જીતુભાઈ ભાયલાલભાઈ મકવાણા, દેવજીભાઈ જેશીંગભાઈ ડગળા, સરજુ સુરેશભાઈ ઘટાડ, જીવરાજભાઈ ભનાભાઈ ગોહેલ અને ભાવેશભાઈ સાભાભાઈ કંટારીયા તરીકે કરી છે. તમામ આરોપીઓ વિરુદ્ધ ઘોઘારોડ પોલીસ સ્ટેશનમાં જુગાર પ્રતિબંધક અધિનિયમ હેઠળ ગુનો નોંધવામાં આવ્યો છે.દરોડા દરમિયાન પોલીસે ગંજીપત્તાના ૫૨ પાનાં તેમજ રોકડ રૂ.૨૪,૨૬૦ મળી કુલ રૂ.૨૪,૨૬૦નો મુદ્દામાલ જપ્ત કર્યો છે. જાહેર સ્થળે જુગાર રમતા તત્વો સામે પોલીસ દ્વારા કડક કાર્યવાહી કરવામાં આવી રહી છે, જેના કારણે આવા ગેરકાયદેસર પ્રવૃત્તિઓ પર અંકુશ મૂકવામાં મદદ મળી રહી છે.પોલીસે જણાવ્યું હતું કે શહેરમાં શાંતિ અને કાયદો-વ્યવસ્થા જળવાઈ રહે તે માટે આવી કામગીરી સતત ચાલુ રહેશે અને ગેરકાયદેસર પ્રવૃત્તિઓમાં સંડોવાયેલા લોકો સામે કડક પગલાં લેવામાં આવશે.
---------------
હિન્દુસ્થાન સમાચાર / GONDALIYA DISHANT
