ભાવનગર, 19 એપ્રિલ (હિ.સ.) : તાજેતરમાં ભાવનગર ખાતે યોજાયેલી ભવ્ય “ટેલેન્ટ સ્પર્ધા”માં શહેરની અનેક પ્રતિષ્ઠિત શૈક્ષણિક સંસ્થાઓએ ઉત્સાહભેર ભાગ લઈને પોતાની કલાત્મક પ્રતિભાનો અદ્ભુત પરિચય આપ્યો હતો. સંગીત, નૃત્ય અને સાંસ્કૃતિક કાર્યક્રમોથી સજ્જ આ સ્પર્ધામાં મિશ્રરાસ, લગ્નગીત, ટિપ્પણી નૃત્ય સહિતની વિવિધ રજૂઆતો દ્વારા દર્શકોને મંત્રમુગ્ધ કરી દીધા હતા.
આ સ્પર્ધામાં ભાવનગરની ગાંધી મહિલા કોલેજ (મહિલા સર્કલ)ની વિદ્યાર્થિનીઓએ ટિપ્પણી નૃત્યમાં અદભૂત અને મનમોહક રજૂઆત કરી સૌનું ધ્યાન પોતાની તરફ ખેંચી લીધું હતું. તેમની સુમેળભરી તાલમેલ, પરંપરાગત ભાવના અને ઊર્જાસભર અભિવ્યક્તિએ નિરીક્ષકોને ખૂબ પ્રભાવિત કર્યા હતા. પરિણામે, ગાંધી મહિલા કોલેજે પ્રથમ વિજેતા સ્થાન પ્રાપ્ત કરી રૂપિયા 15,000નું રોકડ ઇનામ જીત્યું હતું.
આ સિદ્ધિ પાછળ ટિપ્પણી નૃત્યના કોરિયોગ્રાફર અને માર્ગદર્શક ડૉ. મૃણાલ ભટ્ટ-દીક્ષિતનું માર્ગદર્શન મહત્વપૂર્ણ રહ્યું હતું. તેમની કુશળ તાલીમ અને વિદ્યાર્થીઓના અવિરત પ્રયત્નોથી આ સફળતા પ્રાપ્ત થઈ હોવાનું જણાયું હતું. સમગ્ર ટીમની આ ભવ્ય જીત બદલ ચારે તરફથી અભિનંદનનો વરસાટ થયો હતો.
આ પ્રસંગે સંસ્થાના ટ્રસ્ટીગણ તથા પ્રિન્સિપાલ બલભદ્રસિંહજી ચુડાસમાએ પણ ટીમને હાર્દિક અભિનંદન પાઠવી તેમની મહેનત અને પ્રતિભાની પ્રશંસા કરી હતી. તેમણે જણાવ્યું હતું કે આવી સિદ્ધિઓ સંસ્થાની પ્રતિષ્ઠાને નવી ઊંચાઈ આપે છે અને અન્ય વિદ્યાર્થીઓ માટે પ્રેરણારૂપ બને છે.
અંતમાં, તેમણે સમગ્ર ટીમને આવનારા સમયમાં પણ શ્રેષ્ઠ પ્રદર્શન દ્વારા વધુ સફળતા હાંસલ કરવા શુભેચ્છાઓ પાઠવી હતી. ગાંધી મહિલા કોલેજની આ સિદ્ધિએ ભાવનગર શહેરમાં ગૌરવની લાગણી જગાવી છે.
---------------
હિન્દુસ્થાન સમાચાર / GONDALIYA DISHANT
