ભાવનગર,21 એપ્રિલ (હિ.સ.) સિહોર તાલુકાની ટાણા જિલ્લા પંચાયત સીટ હેઠળ આવતી તમામ તાલુકા પંચાયત સીટોના મુખ્ય કાર્યકર્તાઓ સાથે ભાજપની મહત્વપૂર્ણ સંકલન બેઠક યોજાઈ હતી. આ બેઠકમાં ભાવનગર જિલ્લા ભાજપ અધ્યક્ષ દિગ્વિજયસિંહ ગોહિલની વિશેષ હાજરી રહી હતી. બેઠક દરમિયાન આવનારી સ્થાનિક સ્વરાજની ચૂંટણીને ધ્યાનમાં રાખીને કાર્યકર્તાઓને માર્ગદર્શન આપવામાં આવ્યું હતું.

બેઠકમાં તમામ સીટોના મુખ્ય કાર્યકર્તાઓ, પદાધિકારીઓ અને આગેવાનો ઉપસ્થિત રહ્યા હતા. દિગ્વિજયસિંહ ગોહિલે કાર્યકર્તાઓને સંબોધતા જણાવ્યું હતું કે પક્ષની નીતિઓ અને વિકાસકાર્યોને ગામડાં સુધી પહોંચાડવા માટે દરેક કાર્યકર્તાની ભૂમિકા મહત્વપૂર્ણ છે. તેમણે ચૂંટણીમાં વધુમાં વધુ મતદાન થાય અને ભાજપને જીત મળે તે માટે સંગઠનને મજબૂત બનાવવા પર ભાર મૂક્યો હતો.

તેમણે કાર્યકર્તાઓને દરવાજે-દરવાજે સંપર્ક અભિયાન ચલાવવા, મતદારો સાથે સીધી મુલાકાત રાખવા અને સરકારની લોકકલ્યાણકારી યોજનાઓ વિશે માહિતગાર કરવાની સૂચનાઓ આપી હતી. ઉપરાંત, દરેક સીટ પર મજબૂત આયોજન સાથે ચૂંટણી લડવા માટે પણ માર્ગદર્શન આપવામાં આવ્યું હતું.

બેઠક દરમિયાન વિવિધ સીટોના પ્રભારીોએ પોતાના વિસ્તારની સ્થિતિ અંગે માહિતી આપી હતી અને જીત માટેની વ્યૂહરચના પર ચર્ચા કરવામાં આવી હતી. દિગ્વિજયસિંહ ગોહિલે તમામ કાર્યકર્તાઓને એકજૂટ રહીને કાર્ય કરવા અને પક્ષના હિતમાં શ્રેષ્ઠ પ્રદાન આપવા આહ્વાન કર્યું હતું.

આ સંકલન બેઠકથી કાર્યકર્તાઓમાં નવી ઊર્જા અને ઉત્સાહ જોવા મળ્યો હતો અને આવનારી ચૂંટણીમાં ભાજપને મજબૂત જીત મળે તેવો વિશ્વાસ વ્યક્ત કરવામાં આવ્યો હતો.

હિન્દુસ્થાન સમાચાર / GONDALIYA DISHANT