વાપી, 21 એપ્રિલ (હિ.સ.) વાપી અને ચલા-દમણને જોડતો 141 કરોડ રૂપિયાનો મહત્વપૂર્ણ ઓવરબ્રિજ પ્રોજેક્ટ છેલ્લા ત્રણ વર્ષથી વધુ સમયથી અધૂરો પડ્યો છે, જેના કારણે સ્થાનિક લોકો અને વેપારીઓમાં ભારે રોષ ફાટી નીકળ્યો છે. દોઢ વર્ષમાં પૂર્ણ થવાનો લક્ષ્યાંક ધરાવતો આ પ્રોજેક્ટ હવે લાંબા સમયથી અધરતાલમાં લટકતો રહ્યો છે.અધૂરા બ્રિજના કારણે રોજબરોજ ભારે ટ્રાફિક જામ સર્જાય છે. ખાસ કરીને ઓફિસ સમય દરમિયાન કલાકો સુધી વાહનચાલકોને રાહ જોવી પડે છે, જેના કારણે અકસ્માતોની શક્યતાઓ પણ વધી રહી છે.આ ઓવરબ્રિજનો હેતુ વાપી, ચલા અને દમણ વિસ્તાર વચ્ચે સરળ અને ઝડપી અવરજવર સુનિશ્ચિત કરવાનો હતો, પરંતુ કામમાં થયેલા લાંબા વિલંબે લોકોને ભારે મુશ્કેલીમાં મૂકી દીધા છે.સ્થાનિક વેપારીઓના જણાવ્યા મુજબ, ટ્રાફિક અને અવરજવરની સમસ્યાઓને કારણે ગ્રાહકોની સંખ્યા ઘટી ગઈ છે,જેના કારણે વેપાર પર સીધી અસર પડી રહી છે. ઘણા ગ્રાહકો હવે વિકલ્પિક રસ્તા અથવા ઓનલાઈન ખરીદી તરફ વળી રહ્યા છે.વરસાદી મોસમ દરમિયાન સ્થિતિ વધુ ખરાબ બની જાય છે. પાણી ભરાવાને કારણે માર્ગો બંધ થઈ જાય છે અને લોકોને લાંબા અંતરેથી ફેરો મારીને આવવું પડે છે, જેના કારણે સમય અને ઈંધણ બંનેનો વ્યય થાય છે.આ મુદ્દે ગુજરાતના નાણાં અને ઉર્જા મંત્રી કનુભાઈ દેસાઈનું નામ પણ ચર્ચામાં છે, કારણ કે તેઓ આ વિસ્તારમાંથી જ જોડાયેલા છે. છતાં પ્રોજેક્ટ પૂર્ણ થવા અંગે હજુ સુધી કોઈ ચોક્કસ સમયમર્યાદા જાહેર કરવામાં આવી નથી.સ્થાનિક નાગરિકો અને વેપારીઓ હવે માંગ કરી રહ્યા છે કે સરકાર આ પ્રોજેક્ટને પ્રાથમિકતા આપે અને તાત્કાલિક પૂર્ણ કરાવે. વારંવારના આશ્વાસનો છતાં જમીન પર પ્રગતિ ન દેખાતા લોકોમાં અસંતોષ વધી રહ્યો છે.આ પ્રોજેક્ટનો લાંબા સમયથી લટકતો પ્રશ્ન હવે વિસ્તારના વિકાસ પર પણ અસર કરી રહ્યો છે, અને લોકો સરકાર પાસેથી ઝડપી અને સ્પષ્ટ કાર્યવાહી ની અપેક્ષા રાખી રહ્યા છે.

હિન્દુસ્થાન સમાચાર / Krishna Ghanshyam Jha