કચ્છ, 06 એપ્રિલ (હિ.સ.) : કચ્છના મુખ્ય શહેર Bhujમાં ફરી એકવાર સુરક્ષાને લઈને ચિંતાજનક પરિસ્થિતિ ઉભી થઈ છે. શહેરની આરટીઓ કચેરીને બોમ્બથી ઉડાવી દેવાની ધમકી આપતો ઈમેલ મળતા તંત્ર તાત્કાલિક હરકતમાં આવી ગયું હતું. ઘટનાને પગલે કચેરી વિસ્તારમાં અચાનક અફરાતફરીનો માહોલ સર્જાયો હતો.

મળતી માહિતી મુજબ, આજે સવારે પશ્ચિમ કચ્છની આરટીઓ કચેરીના અધિકારીઓને અજાણ્યા સ્ત્રોતમાંથી ધમકીભર્યો ઈમેલ મળ્યો હતો. ઈમેલમાં કચેરીને નિશાન બનાવી બોમ્બ વિસ્ફોટ કરવાની ચેતવણી આપવામાં આવી હતી. પરિસ્થિતિની ગંભીરતાને ધ્યાનમાં રાખીને તંત્ર દ્વારા તરત જ કચેરી ખાલી કરાવવાનો નિર્ણય લેવામાં આવ્યો હતો, જેથી કોઈ અનિચ્છનીય ઘટના ટાળી શકાય.

ઈમેલ મળ્યાની માહિતી મળતા જ પશ્ચિમ કચ્છ પોલીસ તંત્ર સજાગ બની ગયું હતું. પોલીસની સાથે બોમ્બ સ્ક્વોડ અને ડોગ સ્ક્વોડની ટીમો પણ તાત્કાલિક સ્થળ પર પહોંચી ગઈ હતી. સમગ્ર પરિસરમાં સઘન તપાસ હાથ ધરવામાં આવી રહી છે અને દરેક ખૂણાની તપાસ કરી સંદિગ્ધ વસ્તુઓ માટે ચેકિંગ કરવામાં આવી રહ્યું છે.

સુરક્ષા એજન્સીઓ દ્વારા કચેરીની અંદર અને આસપાસના વિસ્તારોમાં સંપૂર્ણ સર્ચ ઓપરેશન હાથ ધરવામાં આવ્યું છે. અત્યાર સુધી કોઈ શંકાસ્પદ વસ્તુ મળી આવી નથી, પરંતુ તપાસ પૂર્ણ થાય ત્યાં સુધી કડક સુરક્ષા વ્યવસ્થા જાળવી રાખવામાં આવી છે.

ઉલ્લેખનીય છે કે, આ પ્રકારની ધમકીનો આ પહેલો બનાવ નથી. થોડા દિવસો પહેલા, 5 માર્ચના રોજ Bhuj Courtને પણ સમાન રીતે બોમ્બથી ઉડાવી દેવાની ધમકી મળી હતી. તે સમયે પણ તંત્ર દ્વારા વ્યાપક તપાસ હાથ ધરવામાં આવી હતી, પરંતુ કોઈ ખતરનાક વસ્તુ મળી આવી નહોતી.

આ ઘટનાઓને ધ્યાનમાં રાખીને સુરક્ષા એજન્સીઓ વધુ સતર્ક બની ગઈ છે. ઈમેલ મોકલનાર વ્યક્તિ અથવા જૂથ સુધી પહોંચવા માટે સાયબર ક્રાઈમ ટીમ પણ સક્રિય બની છે અને ઈમેલના સોર્સને ટ્રેસ કરવાની કામગીરી શરૂ કરી દેવામાં આવી છે.

શહેરમાં આવી સતત મળતી ધમકીઓના કારણે લોકોમાં ચિંતા વ્યાપી છે, ત્યારે તંત્ર દ્વારા નાગરિકોને અફવાઓથી દૂર રહેવા અને શાંતિ જાળવવા અપીલ કરવામાં આવી છે.

---------------

હિન્દુસ્થાન સમાચાર / Rohit R. Padhiyar