કચ્છ, 07 એપ્રિલ (હિ.સ.) : પશ્ચિમ કચ્છ જિલ્લામાં સોશિયલ મીડિયા મારફતે લોકો સાથે છેતરપીંડી કરવાના એક નવા કિસ્સાનો પર્દાફાશ થયો છે. ફેસબુક પર ખોટી આઇ.ડી. બનાવી “5 લાખના બદલે 15 લાખ રૂપિયા હેન્ડ ટુ હેન્ડ” જેવી લોભામણી જાહેરાતો પોસ્ટ કરીને લોકોને ફસાવવાનો પ્રયાસ કરતો એક ઇસમ લોકલ ક્રાઈમ બ્રાન્ચ દ્વારા ઝડપી પાડવામાં આવ્યો છે.

પોલીસના ઉચ્ચ અધિકારીઓના માર્ગદર્શન હેઠળ પશ્ચિમ કચ્છમાં સસ્તું સોનું આપવાની લાલચ અને પૈસા ડબલ કરવાની ઓફર જેવી ઠગાઈ પ્રવૃત્તિઓ સામે કડક અભિયાન ચલાવવામાં આવી રહ્યું છે. આ અભિયાન અંતર્ગત લોકલ ક્રાઈમ બ્રાન્ચની ટીમ સતત સોશિયલ મીડિયા પર નજર રાખી રહી હતી.

તપાસ દરમિયાન મળેલી ચોક્કસ બાતમીના આધારે પોલીસે ભુજ શહેરના ખેંગાર પાર્ક નજીક ટ્રેપ ગોઠવી એક શંકાસ્પદ યુવાનને ઝડપી પાડ્યો. તપાસમાં બહાર આવ્યું કે આ ઇસમ પોતાના મોબાઇલ ફોનમાં “Vijay Soni” નામથી ફેસબુક પર ખોટી આઇ.ડી. ચલાવતો હતો. તે આઇ.ડી. મારફતે નકલી ભારતીય ચલણી નોટોના વીડિયો બનાવી “5 લાખ આપો અને 15 લાખ મેળવો” જેવી પોસ્ટ વાયરલ કરી લોકોને વિશ્વાસમાં લેતો હતો.

પ્રાથમિક પૂછપરછમાં આરોપીએ સ્વીકાર્યું કે તે સોશિયલ મીડિયા દ્વારા લોકોને સંપર્ક કરી પહેલા વિશ્વાસ જીતતો અને પછી નાણાં મેળવવાનો પ્રયાસ કરતો હતો. આ રીતે તે લોકોને છેતરપીંડી કરીને ગેરકાયદેસર આર્થિક લાભ મેળવવા માગતો હતો.

પકડાયેલ ઇસમની ઓળખ ઇમરાન ઉર્ફે નીલભા કાસમ સુમરા (ઉંમર 21), રહે. ગીતા માર્કેટ, ભુજ તરીકે થઈ છે. પોલીસે તેના પાસેથી એક મોબાઇલ ફોન પણ કબ્જે કર્યો છે, જેનો ઉપયોગ આ ઠગાઈ માટે કરવામાં આવતો હતો.

આ મામલે ભુજ શહેર એ-ડિવિઝન પોલીસ સ્ટેશનમાં સંબંધિત કલમો હેઠળ ગુનો નોંધી આગળની કાર્યવાહી હાથ ધરવામાં આવી છે. પોલીસએ નાગરિકોને પણ ચેતવણી આપી છે કે સોશિયલ મીડિયા પર આવી લોભામણી ઓફરો અને અજાણ્યા લોકો પર વિશ્વાસ ન કરે અને કોઈ પણ શંકાસ્પદ પ્રવૃત્તિની તાત્કાલિક જાણ પોલીસને કરે.

---------------

હિન્દુસ્થાન સમાચાર / Rohit R. Padhiyar