કચ્છ, 07 એપ્રિલ (હિ.સ.) : પૂર્વ કચ્છ જિલ્લામાં મિલકત સંબંધિત ગુનાઓ પર નિયંત્રણ મેળવવા માટે પોલીસ તંત્ર સક્રિય બન્યું છે. આ જ દિશામાં અંજાર પોલીસને મહત્વપૂર્ણ સફળતા પ્રાપ્ત થઈ છે, જેમાં આદીપુર વિસ્તારમાં થયેલ મો.સા. ચોરીના ગુનાનો ભેદ ઉકેલી આરોપીને મુદ્દામાલ સાથે ઝડપી પાડવામાં આવ્યો છે.

પોલીસ મહાનિરીક્ષક સરહદી રેન્જ ભુજ શ્રી ચિરાગ કોરડીયા, પૂર્વ-કચ્છ ગાંધીધામના પોલીસ અધિક્ષક શ્રી સાગર બાગમાર તેમજ અંજાર વિભાગના નાયબ પોલીસ અધિક્ષક શ્રી મુકેશ ચૌધરીના માર્ગદર્શન હેઠળ મિલકત સંબંધિત ગુનાઓ ઉકેલવા માટે ખાસ અભિયાન હાથ ધરવામાં આવ્યું છે. આ અભિયાન અંતર્ગત અંજાર પોલીસ સ્ટેશનના પોલીસ ઇન્સ્પેક્ટર શ્રી એચ.એ. જાડેજાની સૂચનામાં પોલીસ ટીમ દ્વારા સતત પેટ્રોલિંગ અને તપાસ કામગીરી કરવામાં આવી રહી હતી.

પેટ્રોલિંગ દરમિયાન પોલીસ ટીમ અંજાર શહેરમાં આવેલ આશાબા વે-બ્રિજ નજીક પહોંચી હતી, જ્યાં ખાનગી બાતમીના આધારે એક શંકાસ્પદ વ્યક્તિ નંબર પ્લેટ વગરની મોટરસાયકલ સાથે જોવા મળ્યો હતો. પોલીસએ તરત જ કાર્યવાહી કરી તેને અટકાવી પૂછપરછ શરૂ કરી હતી. શરૂઆતમાં તે વ્યક્તિએ સંતોષકારક જવાબ આપ્યો નહોતો અને વાહનના કોઈ આધાર પુરાવા રજૂ કરી શક્યો નહોતો.

પોલીસે વધુ કડક પૂછપરછ કરતાં તેણે કબૂલ્યું કે મોટરસાયકલ આદીપુરના મદનસિંહ ચોક વિસ્તારેથી ચોરી કરવામાં આવી હતી. આ સ્વીકાર બાદ પોલીસે તરત જ આરોપીને કસ્ટડીમાં લઈને ચોરી કરાયેલ મોટરસાયકલ કબ્જે કરી કાયદેસરની કાર્યવાહી હાથ ધરી છે.

પકડાયેલ આરોપીની ઓળખ કાનજીભાઈ કરસનભાઈ ડાંગર (ઉંમર 39), રહે. મેઘપર બોરીચી, તા. અંજાર-કચ્છ તરીકે થઈ છે. આ મામલે આદીપુર પોલીસ સ્ટેશનમાં ગુનો નંબર 0205/2026 હેઠળ BNS કલમ 303(2) મુજબ ગુનો નોંધાયેલ છે.

પોલીસ દ્વારા કબ્જે કરાયેલ મુદ્દામાલમાં એક મોટરસાયકલનો સમાવેશ થાય છે, જેની અંદાજિત કિંમત રૂપિયા 30,000 હોવાનું જાણવા મળ્યું છે.

આ સફળ કામગીરીમાં અંજાર પોલીસ સ્ટેશનના પોલીસ ઇન્સ્પેક્ટર શ્રી એચ.એ. જાડેજા તથા તેમની ટીમે મહત્વપૂર્ણ ભૂમિકા ભજવી હતી. પોલીસની સતર્કતા અને ઝડપી કામગીરીને કારણે ચોરીનો ગુનો ઝડપથી ઉકેલાયો છે, જેને કારણે વિસ્તારમાં કાયદો અને વ્યવસ્થામાં વધુ મજબૂતી આવી છે.

---------------

હિન્દુસ્થાન સમાચાર / Rohit R. Padhiyar