કચ્છ, 08 એપ્રિલ (હિ.સ.) : માધાપર ગામમાં ચૈત્ર માસની પવિત્ર પર્વણીને અવસર બનાવી નારી શક્તિ મહિલા મંડળ દ્વારા આયોજિત ત્રિદિવસીય ઓખાહરણ કથા મહોત્સવ ભક્તિભાવ અને આધ્યાત્મિક ઉર્જાથી ઓતપ્રોત વાતાવરણ વચ્ચે સફળતાપૂર્વક પૂર્ણ થયો હતો. તા. 3 એપ્રિલથી 5 એપ્રિલ, 2026 દરમિયાન સરસ્વતી વિદ્યાલયના વિશાળ પ્રાંગણમાં યોજાયેલા આ ધાર્મિક કાર્યક્રમમાં મોટી સંખ્યામાં મહિલાઓએ ઉત્સાહભેર હાજરી આપી હતી.

આ કથાનું વક્તૃત્વ આચાર્ય દીપભાઈ વ્યાસ દ્વારા કરવામાં આવ્યું હતું, જેમણે તેમની સંગીતમય ટીમ સાથે વ્યાસપીઠ પરથી સરળ ભાષા અને ભાવપૂર્ણ રજૂઆત દ્વારા શ્રોતાઓને ઓખાહરણ કથાનું જીવંત દર્શન કરાવ્યું હતું. તેમની વાણી અને સંગીતના સુમેળથી સમગ્ર વાતાવરણ ભક્તિરસથી ભીનું બની ગયું હતું.

નારી શક્તિ મહિલા મંડળના સ્થાપક તુષારિબેન વેકરીયાના માર્ગદર્શન હેઠળ આ કાર્યક્રમનું આયોજન ખૂબ જ સુવ્યવસ્થિત રીતે કરવામાં આવ્યું હતું. ત્રણેય દિવસ દરમિયાન બહેનોમાં વિશેષ ઉમંગ જોવા મળ્યો હતો અને કથાશ્રવણ દ્વારા આધ્યાત્મિક સંતોષ પ્રાપ્ત કર્યો હતો.

આ કાર્યક્રમનો મુખ્ય હેતુ સમાજમાં ધાર્મિક મૂલ્યો, સંસ્કારો અને આધ્યાત્મિકતા પ્રત્યે જાગૃતિ ફેલાવવાનો રહ્યો હતો, જેમાં મંડળને નોંધપાત્ર સફળતા મળી છે.

કાર્યક્રમના યજમાનો તરીકે દયાબેન કાપડિયા, મીનાબેન ઉપાધ્યાય, પ્રીતિબેન આથા, અંજનાબેન ઉપાધ્યાય, ગીતાબેન કનજારિયા, વર્ષાબેન જોબનપુત્રા, જલ્પાબેન પંડ્યા અને મુક્તાબેન કાનપરાએ મહત્વપૂર્ણ ભૂમિકા ભજવી હતી.

આ ઉપરાંત કાર્યક્રમને સફળ બનાવવા માટે ઉષાબેન મચ્છર, વર્ષાબેન ઉમરાણીયા, ગીતાબેન ધંધુકિયા, જયશ્રીબેન પટેલ, નિશાબેન ગોસ્વામી, મીનાક્ષીબેન ઠક્કર, હેતલબેન કાનડે, જ્યોતિબેન હડિયા અને પાયલબેન ઓઝા સહિતની બહેનોનો પણ અમૂલ્ય સહયોગ રહ્યો હતો.

આ રીતે માધાપરમાં આયોજિત આ ઓખાહરણ કથા માત્ર ધાર્મિક કાર્યક્રમ નહીં પરંતુ સમાજમાં એકતા, સંસ્કાર અને નારી શક્તિના પ્રતીક રૂપે યાદગાર બની રહી છે.

---------------

હિન્દુસ્થાન સમાચાર / Rohit R. Padhiyar