હૈદરાબાદ, નવી દિલ્હી, 02 એપ્રિલ (હિ.સ.). 12માં આંતરરાષ્ટ્રીય યોગ દિવસની 50 દિવસની ઉલટી ગણતરીના અવસર પર હૈદરાબાદના કાન્હા શાંતિ વનમમાં એક ઐતિહાસિક સિદ્ધિ નોંધાઈ હતી. આ ભવ્ય આયોજનમાં અંદાજે 6,000 લોકોએ એકસાથે ‘ભુજંગાસન’ કરીને નવો એશિયા રેકોર્ડ બનાવ્યો.

આ કાર્યક્રમ મોરારજી દેસાઈ રાષ્ટ્રીય યોગ સંસ્થાનના નેજા હેઠળ આયોજિત કરવામાં આવ્યો હતો. સહભાગીઓએ નિર્ધારિત સમય સુધી એકસાથે ભુજંગાસનનો અભ્યાસ કરીને એશિયા બુક ઓફ રેકોર્ડ્સમાં પોતાનું નામ નોંધાવ્યું, જેને સત્તાવાર માન્યતા પણ મળી છે.

આ આયોજનનો મુખ્ય હેતુ માત્ર રેકોર્ડ બનાવવાનો જ નહોતો, પરંતુ લોકોને યોગને તેમની દૈનિક જીવનશૈલીમાં સામેલ કરવા માટે પ્રેરિત કરવાનો પણ હતો. કાર્યક્રમમાં વિવિધ દેશોના ઉચ્ચાયોગના પ્રતિનિધિઓ વર્ચ્યુઅલ માધ્યમથી જોડાયા હતા, જ્યારે વિશ્વના અલગ-અલગ ભાગોમાંથી આવેલા યોગ સાધકો અને શરણાર્થીઓએ પણ ઉત્સાહપૂર્વક ભાગ લીધો હતો.

આ પ્રસંગે કેન્દ્રીય મંત્રી જી. કિશન રેડ્ડી સહિત અનેક મહાનુભાવો ઉપસ્થિત રહ્યા હતા. યોગાભ્યાસનું નેતૃત્વ સંસ્થાના નિયામક ડૉ. કાશીનાથે કર્યું હતું, જેમણે સહભાગીઓને સાચી રીતે આસન કરવા માટે માર્ગદર્શન આપ્યું હતું.

કાર્યક્રમના અંતે શ્રી રામચંદ્ર મિશનના અધ્યક્ષ કમલેશ પટેલ (દાજી) ના નિર્દેશનમાં સામૂહિક ધ્યાન સત્રનું આયોજન કરવામાં આવ્યું હતું. આ ધ્યાન સત્રએ સમગ્ર વાતાવરણને આધ્યાત્મિક ઉર્જાથી ભરી દીધું હતું.

આ સિદ્ધિ માત્ર મોટી સંખ્યામાં લોકોની ભાગીદારી જ નથી દર્શાવતી, પરંતુ યોગ અને સમગ્ર સ્વાસ્થ્ય પ્રત્યે સમાજમાં વધતી જતી જાગૃતિ અને પ્રતિબદ્ધતાને પણ ઉજાગર કરે છે.

હિન્દુસ્થાન સમાચાર / દેવ કુમાર પુખરાજ / ઉદય કુમાર સિંહ

હિન્દુસ્થાન સમાચાર / ડો.હિતેશ એન.વ્યાસ