નવી દિલ્હી, 02 મે (હિ.સ.): વિદેશ રાજ્ય મંત્રી કીર્તિ વર્ધન સિંહ અમેરિકાના ન્યૂયોર્કમાં 4 થી 8 મે દરમિયાન સંયુક્ત રાષ્ટ્ર મહાસભાના નેજા હેઠળ આયોજિત થનારા બીજા આંતરરાષ્ટ્રીય સ્થળાંતર સમીક્ષા મંચ (આઈએમઆરએફ) માં ભારતીય પ્રતિનિધિમંડળનું નેતૃત્વ કરશે.

આંતરરાષ્ટ્રીય સ્થળાંતર સમીક્ષા મંચ (આઈએમઆરએફ) સ્થળાંતર પરના વૈશ્વિક કરારના અમલીકરણ અને ટકાઉ વિકાસ લક્ષ્યો સાથેના તેના આંતર-સંબંધો પર ચર્ચા કરવા તથા પ્રગતિ શેર કરવા માટેના પ્રાથમિક આંતર-સરકારી વૈશ્વિક મંચ તરીકે કાર્ય કરે છે.

બીજું આઈએમઆરએફ વર્ષ 2022 માં આયોજિત પ્રથમ આઈએમઆરએફ ના સાતત્યમાં યોજાઈ રહ્યું છે. જેમાં ભારતે સક્રિયપણે ભાગ લીધો હતો અને પોતાના પ્રવાસી સમુદાયના હિતોના રક્ષણ અને સંવર્ધન માટે મહત્વપૂર્ણ યોગદાન આપ્યું હતું.

વિદેશ મંત્રાલયના જણાવ્યા અનુસાર, તેમાં ચાર સંવાદાત્મક બહુ-હિતધારક ગોળમેજી પરિષદો, એક નીતિગત ચર્ચા અને એક પૂર્ણ સત્રનો સમાવેશ થશે. તેના પરિણામે એક પ્રગતિ ઘોષણાપત્ર અપનાવવામાં આવશે.

મુલાકાત દરમિયાન સિંહ ન્યૂયોર્કમાં આયોજિત આઈએમઆરએફ ના પૂર્ણ સત્રમાં ભારતનું રાષ્ટ્રીય નિવેદન રજૂ કરશે. ભારત આઈએમઆરએફ દરમિયાન ‘સ્થળાંતર શાસનમાં ડિજિટલ નવીનતાનો લાભ લેવો - ભારતનો ઈ-માઈગ્રેટ અનુભવ’ શીર્ષક હેઠળ એક સહ-કાર્યક્રમનું આયોજન અને યજમાની પણ કરશે.

આ મુલાકાત દરમિયાન રાજ્ય મંત્રી આઈએમઆરએફ માં ભાગ લઈ રહેલા અન્ય સભ્ય દેશોના વરિષ્ઠ સંયુક્ત રાષ્ટ્રના અધિકારીઓ અને મંત્રીઓ સાથે પણ મુલાકાત કરે તેવી શક્યતા છે.

હિન્દુસ્થાન સમાચાર / અનૂપ શર્મા / પવન કુમાર

હિન્દુસ્થાન સમાચાર / ડો.હિતેશ એન.વ્યાસ