નવી દિલ્હી, 26 મે (હિ.સ.) કોંગ્રેસ મહાસચિવ (સંચાર) જયરામ રમેશે પશ્ચિમ એશિયા સંકટ અને અર્થતંત્રને લઈને નાણામંત્રી નિર્મલા સીતારમણના ‘3F’ વાળા નિવેદન પર કેન્દ્ર સરકારને ઘેરી. તેમણે કહ્યું કે, નાણામંત્રી પોતે ઇંધણ, ખાતર અને વિદેશી હૂંડિયામણ ભંડાર પર દબાણની વાત કરી રહ્યા છે, જ્યારે દેશમાં પેટ્રોલ-ડીઝલની કિંમતો સતત વધવાને કારણે સામાન્ય લોકો પર દબાણ છે.

જયરામ રમેશે મંગળવારે ‘એક્સ’ પર કહ્યું કે, નાણામંત્રીએ ‘3એફ’ એટલે કે, ફ્યુઅલ, ફર્ટિલાઇઝર્સ અને ફોરેક્સને ગંભીર ચિંતાનો વિષય ગણાવ્યો છે, પરંતુ તેઓ ચોથા અને સૌથી મહત્વપૂર્ણ ‘એફ’ ને ભૂલી રહ્યા છે. ખાનગી રોકાણનો ઘટતો દર છેલ્લા કેટલાક વર્ષોથી સતત જોવા મળી રહ્યો છે. કુલ પ્રત્યક્ષ વિદેશી રોકાણ (એફડીઆઈ) પ્રવાહમાં ઘટાડો થયો છે અને સકળ ઘરેલુ ઉત્પાદન (જીડીપી) ના ટકાવારી તરીકે, ખાનગી કોર્પોરેટ રોકાણ 2014 પહેલાના તેના સર્વોચ્ચ સ્તરના લગભગ અડધા પર પહોંચી ગયું છે.

રમેશે જણાવ્યું કે, ભારતીય ઉદ્યોગો હવે વિદેશમાં વધુ સ્થિર અને નફાકારક તકો શોધી રહ્યા છે અને ભારતીય કોર્પોરેટ હસ્તીઓ પણ વિદેશમાં સ્થાયી થઈ રહી છે. રોકાણ એ માત્ર નાણાકીય નિર્ણય નથી હોતો, પરંતુ તે મનોવૈજ્ઞાનિક પરિબળોથી પણ પ્રભાવિત થાય છે. વ્યાપક ગ્રાહક માંગમાં વૃદ્ધિના અભાવે કંપનીઓને રોકાણ કરવા માટે નિરુત્સાહિત કરી છે.

ઉલ્લેખનીય છે કે, સીતારમણે ભારતીય લઘુ ઉદ્યોગ વિકાસ બેંક (સિડબી)ની 37મી વર્ષગાંઠના અવસરે ‘3એફ’ એટલે કે ફ્યુઅલ, ફર્ટિલાઇઝર અને ફોરેક્સ પર વિશેષ ધ્યાન આપવાની અપીલ કરી હતી.

હિન્દુસ્થાન સમાચાર / પ્રશાંત શેખર / મુકુંદ

હિન્દુસ્થાન સમાચાર / ડો.હિતેશ એન.વ્યાસ