ગંગટોક, નવી દિલ્હી, 26 મે (હિ.સ.). રાષ્ટ્રપતિ દ્રૌપદી મુર્મુ સિક્કિમના ત્રણ દિવસના સત્તાવાર પ્રવાસે મંગળવારે ગંગટોક પહોંચી ગયા છે. તેઓ 28 મે સુધી સિક્કિમમાં રહેશે અને આ દરમિયાન અનેક કાર્યક્રમોમાં ભાગ લેશે.

રાષ્ટ્રપતિ મુર્મુ, આજે ભારતીય સેનાના હેલિકોપ્ટર દ્વારા બાગડોગરા (પશ્ચિમ બંગાળ) થી રવાના થઈને રાજધાનીના લિબિંગ સ્થિત હેલિપેડ પર ઉતર્યા. હેલિપેડ પર રાષ્ટ્રપતિનું સ્વાગત સિક્કિમના રાજ્યપાલ ઓમ પ્રકાશ માથુર, મુખ્યમંત્રી પ્રેમ સિંહ તમાંગ, વિધાનસભા અધ્યક્ષ એમએન શેરપા અને ઉપાધ્યક્ષ રાજકુમારી થાપાની સાથે રાજ્યના મંત્રીઓ, સાંસદો, મુખ્ય સચિવ, પોલીસ મહાનિર્દેશક અને ભારતીય સેનાના પ્રતિનિધિઓએ કર્યું. તેઓ હેલિપેડથી સ્થાનિક લોક ભવન જવા માટે રવાના થયા.

રાષ્ટ્રપતિ મુર્મુ, તેમના સિક્કિમ પ્રવાસના પ્રથમ દિવસે આજે રાજધાનીમાં પિંક સિટી રનર બસોને લીલી ઝંડી બતાવશે. આ સિટી રનર સેવા રાજ્ય સરકાર ખાસ કરીને મહિલાઓ માટે શરૂ કરી રહી છે અને મહિલાઓ તેમાં વિનામૂલ્યે મુસાફરી કરી શકશે. ત્યારબાદ, તેઓ રિજ પાર્કમાં આર્કેડિયમની મુલાકાત લેશે. આર્કેડિયમનું ઉદ્ઘાટન ગત વર્ષે વડાપ્રધાન નરેન્દ્ર મોદીએ વર્ચ્યુઅલ રીતે કર્યું હતું. રાષ્ટ્રપતિ આજે સાંજે દેવરાલીમાં નામગ્યાલ ઇન્સ્ટિટ્યૂટ ઓફ તિબેટોલોજીની પણ મુલાકાત લેશે.

રાષ્ટ્રપતિ મુર્મુ, બીજા દિવસે 27 મે ના રોજ સવારે 9 વાગ્યે ભારત-ચીન સરહદ પર નાથુલા દર્રાની મુલાકાત લેશે. તે જ દિવસે બપોરે તેઓ સિક્કિમ યુનિવર્સિટીના 7મા દીક્ષાંત સમારોહમાં હાજરી આપશે. પોતાના પ્રવાસના છેલ્લા દિવસે 28 મે ના રોજ રાષ્ટ્રપતિ રાજધાનીના પાલજોર સ્ટેડિયમમાં યોજાનારા અલંકરણ સમારોહમાં સિક્કિમ પોલીસને ભારતના રાષ્ટ્રપતિનો 'પોલીસ કલર' એનાયત કરશે. આ એવોર્ડ સિક્કિમ પોલીસને દેશ પ્રત્યેની તેમની ઉત્કૃષ્ટ સેવા બદલ આપવામાં આવી રહ્યો છે. સિક્કિમ આ એવોર્ડ મેળવનાર દેશનું 15મું રાજ્ય છે.

હિન્દુસ્થાન સમાચાર / બિશાલ ગુરુંગ / સુનીલ સક્સેના

હિન્દુસ્થાન સમાચાર / ડો.હિતેશ એન.વ્યાસ