નવી દિલ્હી, 03 મે (હિ.સ.). દ્વિપક્ષીય સૈન્ય અભ્યાસ 'સિન્બેક્સ' માટે ભારતીય સેનાની ટુકડી કંબોડિયા રવાના થઈ ગઈ છે. આ અભ્યાસ 04 થી 17 મે દરમિયાન કંબોડિયા સામ્રાજ્યના કમ્પોંગ સ્પેયુ પ્રાંતમાં સ્થિત ટેકો સેન ફ્નોમ થોમ મ્રીસ પ્રોવ રોયલ કંબોડિયન એરફોર્સ તાલીમ કેન્દ્ર (કેમ્પ બેસિલ) ખાતે યોજાશે. ભારતના સંરક્ષણ સહયોગ હેઠળ કંબોડિયા સાથેનો આ દ્વિપક્ષીય અભ્યાસ ‘સિન્બેક્સ-II’ વૈશ્વિક સુરક્ષા પડકારોના બદલાતા પરિદ્રશ્યના સંદર્ભમાં મહત્વપૂર્ણ છે.

સંરક્ષણ મંત્રાલયના જણાવ્યા અનુસાર, આ અભ્યાસ સંયુક્ત રાષ્ટ્રના આદેશના પ્રકરણ VII ના માળખા હેઠળ હાથ ધરવામાં આવશે, જેમાં ઉપ-પરંપરાગત વાતાવરણમાં અભિયાનોના સંચાલનનું સંયુક્ત તાલીમ પ્રદર્શન કરવામાં આવશે. ભારતીય સેનાની ટુકડીમાં 120 સૈન્ય કર્મચારીઓ છે, જેમાંથી મોટાભાગના મરાઠા લાઈટ ઈન્ફન્ટ્રી રેજિમેન્ટની એક બટાલિયનના છે. કંબોડિયાની ટુકડી 160 કર્મચારીઓની છે, જે રોયલ કંબોડિયન આર્મીના છે. આ સંયુક્ત અભ્યાસ તે આતંકવાદ વિરોધી અભિયાનોની વર્તમાન કાર્ય-પ્રક્રિયાને અનુરૂપ હશે, જેનો સામનો સંયુક્ત રાષ્ટ્ર શાંતિ રક્ષા અભિયાનો દરમિયાન શાંતિ રક્ષક દળો કરે છે.

આ દ્વિપક્ષીય સૈન્ય અભ્યાસના ઉદ્દેશ્યની પ્રાપ્તિ વિવિધ વ્યવહારુ તેમજ વ્યાપક વિચાર-વિમર્શ અને વ્યૂહાત્મક અભ્યાસો દ્વારા કરવામાં આવશે. અભ્યાસ અંતર્ગત ડ્રોન સંચાલન, મોર્ટાર અને સ્નાઈપર વ્યૂહરચના સહિત વિશેષ કૌશલ્ય તાલીમ પણ આપવામાં આવશે. તેનો મુખ્ય ઉદ્દેશ્ય બંને દેશોની ટુકડીઓ વચ્ચે આંતર-કાર્યક્ષમતા, સંકલન અને ઓપરેશનલ તાલમેલને મજબૂત કરવાનો છે. આ અભ્યાસ માત્ર વૈશ્વિક શાંતિ જાળવવા પ્રત્યે બંને દેશોની ક્ષમતાને પ્રદર્શિત કરશે નહીં, પરંતુ અર્ધ-શહેરી પરિદ્રશ્યમાં દુશ્મન દળો વિરુદ્ધ વિવિધ અભિયાનો દરમિયાન પ્રાપ્ત થયેલા ઓપરેશનલ અનુભવોના આદાનપ્રદાન અને શ્રેષ્ઠ પદ્ધતિઓ શેર કરવા માટે પણ પ્રોત્સાહિત કરશે.

હિન્દુસ્થાન સમાચાર / સુનીત નિગમ / સંજીવ પાશ

હિન્દુસ્થાન સમાચાર / માધવી વ્યાસ