લખનૌ, નવી દિલ્હી, 03 મે (હિ.સ.). રાજધાનીમાં લેખિકા ડો. શિવાની કટારાના પુસ્તક 'વિકસિત ભારતકા અમૃતકાલ'નું વિમોચન રાજકીય અને બૌદ્ધિક વર્તુળોમાં ચર્ચાનું કેન્દ્ર રહ્યું. કેન્દ્રીય નાણાં રાજ્ય મંત્રી અને ભારતીય જનતા પાર્ટીના પ્રદેશ પ્રમુખ પંકજ ચૌધરીએ પુસ્તકનું વિમોચન કરતા તેને દેશની વિકાસ યાત્રાનો મહત્વપૂર્ણ દસ્તાવેજ ગણાવ્યો.

લેખિકા ડો. શિવાની કટારાએ પુસ્તકમાં પ્રધાનમંત્રી નરેન્દ્ર મોદીના નેતૃત્વમાં છેલ્લા 10 વર્ષમાં થયેલા નીતિગત ફેરફારો, આર્થિક સુધારા, સામાજિક યોજનાઓ અને વૈશ્વિક સ્તરે ભારતની વધતી જતી શાખનું વિસ્તૃત અને તથ્યાત્મક વિશ્લેષણ કર્યું છે. પુસ્તકને એક રીતે 'નવા ભારત'ના પરિવર્તનની કથા તરીકે જોવામાં આવી રહ્યું છે.

લોકાર્પણ સમારોહમાં વિધાન પરિષદના સભ્ય ગોવિંદ નારાયણ શુક્લા, રાજ્યસભાના સાંસદ નવીન જૈન, ભાજપ કાર્યાલય પ્રમુખ ભારત દીક્ષિત, પ્રદેશ મંત્રી શિવ ભૂષણ અને પૂર્વ પ્રાદેશિક સંગઠન મંત્રી શિવ કુમાર પાઠકની હાજરીએ કાર્યક્રમને વિશેષ આયામ આપ્યો. વક્તાઓએ જણાવ્યું હતું કે આ પુસ્તક માત્ર વીતેલા દાયકાની સિદ્ધિઓને જ નથી સાંકળતું, પરંતુ 'વિકસિત ભારત 2047'ના સંકલ્પને પણ સ્પષ્ટ દિશા આપે છે. કાર્યક્રમમાં વક્તાઓએ કહ્યું કે આ કૃતિ સામાન્ય જનતા, વિદ્યાર્થીઓ અને સંશોધકો માટે ઉપયોગી સાબિત થશે. સાથે જ તેને જન-જન સુધી પહોંચાડવાની જરૂરિયાત પર ભાર મૂકવામાં આવ્યો, જેથી લોકો દેશની વિકાસ યાત્રાને સમજી શકે.

ઉલ્લેખનીય છે કે, પુસ્તકનું પ્રકાશન શિલ્પાયન પબ્લિકેશન નવી દિલ્હી દ્વારા કરવામાં આવ્યું છે. સમારોહમાં મોટી સંખ્યામાં બુદ્ધિજીવીઓ, સામાજિક કાર્યકરો અને પક્ષના પદાધિકારીઓ હાજર રહ્યા હતા. સમગ્ર વાતાવરણ ઉત્સાહ અને ગૌરવથી તરબતર જોવા મળ્યું હતું.

હિન્દુસ્થાન સમાચાર / ડો. રાજેશ / સુનિલ સક્સેના

હિન્દુસ્થાન સમાચાર / માધવી વ્યાસ