કચ્છ, 12 જૂન (હિ.સ.) : કચ્છ જિલ્લામાં ગેરકાયદેસર દારૂના વેપાર અને સંગ્રહ સામે પોલીસ દ્વારા સતત કડક કાર્યવાહી હાથ ધરવામાં આવી રહી છે. આ જ અભિયાન અંતર્ગત ભચાઉ પોલીસને મળેલી ચોક્કસ બાતમીના આધારે કરવામાં આવેલી કાર્યવાહી દરમિયાન મોટી માત્રામાં ભારતીય બનાવટનો વિદેશી દારૂ જપ્ત કરવામાં આવ્યો હતો. પોલીસે આ કેસમાં બે આરોપીઓને ઝડપી પાડી તેમની સામે પ્રોહીબીશન કાયદા હેઠળ ગુનો નોંધી આગળની કાયદેસરની કાર્યવાહી હાથ ધરી છે.

પોલીસ મહાનિરીક્ષક ચિરાગ કોરડીયા, પોલીસ અધિક્ષક સાગર બાગમાર તથા ભચાઉ વિભાગના નાયબ પોલીસ અધિક્ષક સાગર સાંબડાના માર્ગદર્શન હેઠળ જિલ્લામાં દારૂબંધીના કાયદાનો કડક અમલ કરાવવા વિશેષ અભિયાન ચાલી રહ્યું છે. તે દરમિયાન ભચાઉ પોલીસ સ્ટેશનનો સ્ટાફ પેટ્રોલિંગમાં હતો ત્યારે ખાનગી સૂત્રો પાસેથી માહિતી મળી હતી કે ભચાઉ તાલુકાના કડરવા ગામ વિસ્તારમાં આવેલા મકાનમાં ગેરકાયદેસર રીતે વિદેશી દારૂનો જથ્થો સંગ્રહ કરવામાં આવ્યો છે.

મળેલી માહિતીના આધારે પોલીસે તાત્કાલિક સ્થળ પર પહોંચી તપાસ હાથ ધરી હતી. તપાસ દરમિયાન મકાનમાંથી વિવિધ બ્રાન્ડની વિદેશી દારૂની બોટલો તેમજ બીયરના ટીન મળી આવ્યા હતા. પોલીસે સમગ્ર જથ્થો કબ્જે કરી લીધો હતો. જપ્ત કરાયેલા મુદ્દામાલમાં વિદેશી દારૂની બોટલો, સ્ટ્રોંગ બીયરના ટીન તેમજ એક મોબાઇલ ફોનનો સમાવેશ થાય છે. જપ્ત કરાયેલા તમામ મુદ્દામાલની કુલ કિંમત અંદાજે રૂ. 24,555 હોવાનું જાણવા મળ્યું છે.

આ કાર્યવાહી દરમિયાન વનરાજભાઈ ગાભુભાઈ રાજપૂત અને બાબુભાઈ ભુરાભાઈ મણકા નામના બે આરોપીઓને ઝડપી લેવામાં આવ્યા હતા. જ્યારે આ કેસમાં સંડોવાયેલા અન્ય એક આરોપી સુરેશ ઉર્ફે પપ્પુ કેશુભાઈ સંઘાર હાલ ફરાર હોવાનું સામે આવ્યું છે. તેની શોધખોળ માટે પોલીસે વિવિધ દિશામાં તપાસ શરૂ કરી છે.

ભચાઉ પોલીસની આ સફળ કાર્યવાહીને કારણે વિસ્તારમાં ગેરકાયદેસર દારૂના સંગ્રહ અને વેચાણ કરતા તત્વોમાં ચિંતાનો માહોલ સર્જાયો છે. પોલીસ અધિકારીઓએ સ્પષ્ટ કર્યું છે કે જિલ્લામાં દારૂબંધીના કાયદાનો ભંગ કરનાર કોઈપણ વ્યક્તિને બક્ષવામાં આવશે નહીં અને આવી પ્રવૃત્તિઓ સામે આગામી દિવસોમાં પણ સઘન અભિયાન ચાલુ રહેશે.

---------------

હિન્દુસ્થાન સમાચાર / Rohit Ramjibhai Padhiyar