નવી દિલ્હી, 12 જૂન (હિ.સ.) ભારતના દિગ્ગજ નિશાનેબાજી કોચ અને પૂર્વ સ્ટાર શૂટર જસપાલ રાણાનું, ગુરુવારે મોડી રાત્રે નવી દિલ્હીના સાકેત સ્થિત એક ખાનગી હોસ્પિટલમાં નિધન થયું. તેઓ 49 વર્ષના હતા. તેમના નિધનથી ભારતીય રમતજગત, ખાસ કરીને નિશાનેબાજી સમુદાયમાં શોકની લાગણી પ્રસરી ગઈ છે.

માહિતી અનુસાર, તાજેતરમાં જર્મનીના મ્યુનિકમાં યોજાયેલા આઈએસએસએફ વર્લ્ડ કપમાંથી ભારતીય ટીમ સાથે પરત ફરતી વખતે તેમની તબિયત બગડી ગઈ હતી. ત્યારબાદ તેમની હૃદય સંબંધિત સારવાર કરવામાં આવી હતી, જેમાં સ્ટેન્ટ પણ મૂકવામાં આવ્યો હતો. નિધન સમયે તેઓ ભારતની પિસ્ટલ નિશાનેબાજી ટીમના હાઇ પરફોર્મન્સ કોચ તરીકે ફરજ બજાવી રહ્યા હતા.

જસપાલ રાણા, ભારતીય નિશાનેબાજીના સૌથી પ્રભાવશાળી નામોમાં ગણાતા હતા. કોચ તરીકે તેમણે અનેક આંતરરાષ્ટ્રીય સ્તરના ખેલાડીઓને તૈયાર કર્યા અને ભારતીય નિશાનેબાજીને નવી ઊંચાઈઓ સુધી પહોંચાડી. તેમના માર્ગદર્શન હેઠળ મનુ ભાકરે 2024 પેરિસ ઓલિમ્પિકમાં બે પદકો જીતીને ઇતિહાસ રચ્યો હતો. તે સ્વતંત્ર ભારતની પ્રથમ ખેલાડી બની હતી જેણે એક જ ઓલિમ્પિકમાં બે પદકો જીત્યા હતા.

ખેલાડી તરીકે પણ જસપાલ રાણાની કારકિર્દી અત્યંત શાનદાર રહી હતી. તેઓ કોમનવેલ્થ ગેમ્સના ઇતિહાસમાં ભારતના સૌથી સફળ ખેલાડીઓમાં સામેલ રહ્યા હતા. તેમણે ચાર આવૃત્તિઓમાં કુલ 15 પદકો જીત્યા હતા, જેમાં 9 સુવર્ણ, 4 રજત અને 2 કાંસ્ય પદકોનો સમાવેશ થાય છે.

સ્પર્ધાત્મક કારકિર્દી બાદ તેમણે કોચિંગને પોતાનું મિશન બનાવ્યું અને મનુ ભાકર, સૌરભ ચૌધરી, અનીશ ભાનવાલા અને ચિંકી યાદવ જેવા અનેક પ્રતિભાશાળી નિશાનેબાજોને આંતરરાષ્ટ્રીય સ્તર સુધી પહોંચાડ્યા.

ભારતીય રમતગમત અને ખેલાડીઓના વિકાસમાં તેમના યોગદાનને ધ્યાનમાં રાખીને તેમને વર્ષ 2020માં દેશના પ્રતિષ્ઠિત દ્રોણાચાર્ય પુરસ્કારથી સન્માનિત કરવામાં આવ્યા હતા.

જસપાલ રાણાનું નિધન ભારતીય નિશાનેબાજી માટે એવી ક્ષતિ માનવામાં આવી રહ્યું છે, જેની ભરપાઈ લાંબા સમય સુધી શક્ય નહીં બને.

હિન્દુસ્થાન સમાચાર / સુનીલ દુબે / સંજીવ પાશ

હિન્દુસ્થાન સમાચાર / ડો.હિતેશ એન.વ્યાસ