જોરહાટ (આસામ), નવી દિલ્હી, 13 જૂન (હિ.સ.). ભારતીય વાયુસેના (આઈએએફ) નું એક એએન-32 પરિવહન વિમાન શુક્રવારે આસામના જોરહાટ સ્થિત રૌરિયા એરફોર્સ સ્ટેશન પર દુર્ઘટનાગ્રસ્ત થયું હતું. પ્રાથમિક માહિતી અનુસાર, વિમાન લેન્ડિંગ દરમિયાન અકસ્માતનો ભોગ બન્યું હતું, ત્યારબાદ તેમાં આગ લાગી ગઈ હતી.

પ્રત્યક્ષદર્શીઓના જણાવ્યા અનુસાર, દુર્ઘટના બાદ એરબેઝ વિસ્તારમાં આગની ઊંચી જ્વાળાઓ અને ઘટ્ટ ધુમાડો જોવા મળ્યો હતો. એવું કહેવામાં આવી રહ્યું છે કે દુર્ઘટનાગ્રસ્ત વિમાન વાયુસેનાની 43 સ્ક્વોડ્રન સાથે સંબંધિત હતું અને નિયમિત સૈન્ય ઉડાન પર હતું. આ વિમાનનો ઉપયોગ સૈન્ય સામગ્રી અને લોજિસ્ટિક્સના પરિવહન માટે કરવામાં આવે છે.

સૂત્રોના જણાવ્યા અનુસાર, વિમાન નિર્ધારિત રનવે પર સુરક્ષિત લેન્ડિંગ કરી શક્યું ન હતું અને એરબેઝના ઘાસવાળા અને અસમતલ ભાગમાં ઉતરી ગયું હતું. લેન્ડિંગ દરમિયાન જોરદાર ધડાકો થયા બાદ વિમાનમાં આગ લાગી ગઈ હતી અને તે બે ભાગમાં વહેંચાઈ ગયું હતું.

અકસ્માતની તરત જ બાદ એરબેઝ પર હાજર ફાયર બ્રિગેડ અને ઇમરજન્સી બચાવ ટીમ ઘટનાસ્થળે પહોંચી ગઈ હતી અને આગ પર કાબૂ મેળવી લીધો હતો. વહીવટીતંત્ર અને સુરક્ષા એજન્સીઓએ રાહત અને બચાવ કામગીરી શરૂ કરી દીધી છે.

ભારતીય વાયુસેનાએ ઘટનાની પુષ્ટિ કરતા જણાવ્યું છે કે, જોરહાટમાં એક એએન-32 વિમાન દુર્ઘટનાનો ભોગ બન્યું છે. વાયુસેનાએ જણાવ્યું કે, આ મામલે તપાસ કરવામાં આવી રહી છે અને વિગતવાર માહિતી ઉપલબ્ધ થવા પર શેર કરવામાં આવશે.

હાલમાં, વિમાનમાં સવાર ક્રૂ મેમ્બર્સ અને અન્ય સૈન્ય કર્મચારીઓની સ્થિતિ અંગે કોઈ સત્તાવાર માહિતી સામે આવી નથી. દુર્ઘટનાના કારણો શોધવા માટે વિગતવાર તપાસ શરૂ કરવામાં આવી છે.

ઉલ્લેખનીય છે કે, જોરહાટ સ્થિત રૌરિયા એરફોર્સ સ્ટેશન ઉત્તર-પૂર્વ ભારતમાં ભારતીય વાયુસેનાનું એક મહત્વપૂર્ણ સૈન્ય મથક છે, જે આ વિસ્તારમાં હવાઈ કામગીરી, સૈન્ય લોજિસ્ટિક્સ સપ્લાય અને વ્યૂહાત્મક પ્રવૃત્તિઓના સંચાલનમાં મહત્વની ભૂમિકા ભજવે છે.

હિન્દુસ્થાન સમાચાર / શ્રીપ્રકાશ / અરવિંદ રાય / અમરેશ દ્વિવેદી

હિન્દુસ્થાન સમાચાર / ડો.હિતેશ એન.વ્યાસ