નવી દિલ્હી, 13 જૂન (હિ.સ.). પ્રવર્તન નિર્દેશાલય (ઇડી) એ, પશ્ચિમ બંગાળના કથિત નગરપાલિકા ભરતી કૌભાંડની તપાસના સિલસિલામાં તૃણમૂલ કોંગ્રેસ (ટીએમસી) ના ધારાસભ્ય અને પૂર્વ મંત્રી મદન મિત્રા સાથે જોડાયેલા સાત પરિસરો પર દરોડા પાડ્યા છે. તપાસ એજન્સીના જણાવ્યા અનુસાર, ભરતી પ્રક્રિયામાં ગેરરીતિઓના બદલામાં લાંચ લેવાના આરોપોની તપાસ કરવામાં આવી રહી છે.

ઇડીએ જણાવ્યું કે, અત્યાર સુધીની તપાસમાં સામે આવ્યું છે કે મદન મિત્રાએ વિવિધ નગરપાલિકાઓ, ખાસ કરીને કમરહાટી નગરપાલિકામાં અયોગ્ય ઉમેદવારોની નિમણૂક કરાવવાના બદલામાં વચેટિયાઓ દ્વારા રોકડ અને સોનાના રૂપમાં લાંચ મેળવી હતી. તપાસ એજન્સીએ જણાવ્યું કે, મદન મિત્રાનો સંબંધ આવી 125 થી વધુ કથિત ગેરકાયદેસર નિમણૂકો સાથે જોડાયેલો હોવાનું જાણવા મળ્યું છે. આ નિમણૂકોમાં પાત્રતાના ધોરણોની અવગણના કરીને ઉમેદવારોને નોકરી અપાવવાના આરોપો છે.

ઇડીએ જણાવ્યું કે, આ કેસમાં મની લોન્ડરિંગ અને કથિત ભરતી ગેરરીતિઓના વિવિધ પાસાઓની તપાસ ચાલી રહી છે. દરોડા દરમિયાન મેળવેલા દસ્તાવેજો અને અન્ય પુરાવાઓનું વિશ્લેષણ કરવામાં આવી રહ્યું છે. આ મામલે આગળ વધુ ખુલાસા થવાની સંભાવના છે.

હિન્દુસ્થાન સમાચાર / પ્રશાંત શેખર / સંજીવ પાશ

હિન્દુસ્થાન સમાચાર / ડો.હિતેશ એન.વ્યાસ