નવી દિલ્હી, 13 જૂન (હિ.સ.). વડાપ્રધાન નરેન્દ્ર મોદીએ, કેન્દ્ર સરકારના 12 વર્ષ પૂર્ણ થવા પર યુવાનોના યોગદાનની પ્રશંસા કરી. તેમણે કહ્યું કે, ભારતના યુવાનો વિજ્ઞાન અને ટેકનોલોજી, ઉત્પાદન, અવકાશ, સેમિકન્ડક્ટર અને ડ્રોન જેવા વિવિધ ક્ષેત્રોમાં પોતાની પ્રતિભા પુરવાર કરી રહ્યા છે અને દેશ તથા વિશ્વના ભવિષ્યને આકાર આપનારા ક્ષેત્રોમાં મહત્વપૂર્ણ યોગદાન આપી રહ્યા છે. યુવાનોની સિદ્ધિઓ વિકસિત ભારતના નિર્માણનો મજબૂત પાયો બની રહી છે.

વડાપ્રધાને શનિવારે સોશિયલ મીડિયા પ્લેટફોર્મ 'એક્સ' પર જણાવ્યું હતું કે, ભારતીય યુવાનોને વિવિધ ક્ષેત્રોમાં ઉત્કૃષ્ટ પ્રદર્શન કરતા જોવા એ અત્યંત આનંદની બાબત છે. દેશના યુવાનો નવાચાર અને ટેકનોલોજી આધારિત ક્ષેત્રોમાં નવા કીર્તિમાન સ્થાપિત કરી રહ્યા છે.

વડાપ્રધાને રમતગમત જગતમાં યુવાનોના યોગદાનની પણ પ્રશંસા કરી હતી. તેમણે કહ્યું કે, ભારતીય યુવા ખેલાડીઓએ અનેક આંતરરાષ્ટ્રીય સ્પર્ધાઓમાં શાનદાર પ્રદર્શન કરીને દેશનું ગૌરવ વધાર્યું છે. તેમની સિદ્ધિઓએ વૈશ્વિક મંચ પર ભારતની પ્રતિષ્ઠાને વધુ મજબૂત બનાવી છે.

વડાપ્રધાને જણાવ્યું હતું કે, દેશમાં રમતગમત માટે બહેતર ઇકોસિસ્ટમ, આધુનિક માળખાકીય સુવિધાઓ અને ખેલાડીઓને મળી રહેલા વધતા સહયોગને કારણે યુવાનો માટે નવી તકો ઊભી થઈ રહી છે. આનાથી વધુને વધુ યુવાનો રમતગમતને કારકિર્દી તરીકે અપનાવવા પ્રેરિત થઈ રહ્યા છે. તેમણે કહ્યું કે, ભારતની યુવા શક્તિ આગામી વર્ષોમાં દેશને નવી ઊંચાઈઓ પર લઈ જવામાં મહત્વની ભૂમિકા ભજવશે.

હિન્દુસ્થાન સમાચાર / માધવી ત્રિપાઠી / સંજીવ પાશ

હિન્દુસ્થાન સમાચાર / ડો.હિતેશ એન.વ્યાસ