નવી દિલ્હી, 13 જૂન (હિ.સ.). રાષ્ટ્રીય જૈવવિવિધતા સત્તામંડળે (એનબીએ) કૃષિ જૈવવિવિધતાના સંરક્ષણ અને ટકાઉ ઉપયોગ સંબંધિત બાબતોમાં નિષ્ણાત સલાહ આપવા માટે કૃષિ જૈવવિવિધતા નિષ્ણાત સમિતિની એક વર્ષ માટે પુનઃરચના કરી છે.

પર્યાવરણ મંત્રાલયે શનિવારે એક અખબારી યાદી બહાર પાડીને જણાવ્યું હતું કે, પદ્મશ્રીથી સન્માનિત પ્રખ્યાત કૃષિ વૈજ્ઞાનિક ડૉ. પી. એલ. ગૌતમને સમિતિના અધ્યક્ષ તરીકે નિયુક્ત કરવામાં આવ્યા છે. ડૉ. ગૌતમ અગાઉ રાષ્ટ્રીય જૈવવિવિધતા સત્તામંડળ અને છોડની જાતો અને ખેડૂતોના અધિકારોના સંરક્ષણ સત્તામંડળ (પીપીવીએફઆરએ) ના અધ્યક્ષ પણ રહી ચૂક્યા છે. પીપીવીએફઆરએ ના વર્તમાન અધ્યક્ષ સમિતિના સહ-અધ્યક્ષ રહેશે.

એનબીએ ના જણાવ્યા અનુસાર, વર્ષ 2005 થી કાર્યરત આ સમિતિ કૃષિ આનુવંશિક સંસાધનો, બિયારણોની નિકાસ, લાભ-વહેંચણી (એબીએસ), પરંપરાગત છોડ સંવર્ધન અને જૈવિક સંસાધનો સંબંધિત સંશોધન સહયોગ જેવા વિષયો પર મહત્વપૂર્ણ સૂચનો આપી રહી છે. સમિતિની ભલામણોએ જૈવવિવિધતા સંરક્ષણ અને કૃષિ સંશોધન વચ્ચે સંતુલન જાળવવામાં મહત્વની ભૂમિકા ભજવી છે.

પુનઃગઠિત સમિતિમાં કૃષિ અને ખેડૂત કલ્યાણ મંત્રાલય, ભારતીય કૃષિ સંશોધન પરિષદ, તમિલનાડુ કૃષિ યુનિવર્સિટી, નેશનલ ઇનોવેશન ફાઉન્ડેશન અને નલસાર લો યુનિવર્સિટી સહિત અનેક અગ્રણી સંસ્થાઓના નિષ્ણાતો અને વરિષ્ઠ પ્રતિનિધિઓનો સમાવેશ કરવામાં આવ્યો છે.

હિન્દુસ્થાન સમાચાર / વિજયાલક્ષ્મી / સંજીવ પાશ

હિન્દુસ્થાન સમાચાર / ડો.હિતેશ એન.વ્યાસ