હૈદરાબાદ, નવી દિલ્હી, 20 જૂન (હિ.સ.). એન્ટી કરપ્શન બ્યુરો (એસીબી) એ, અપ્રમાણસર મિલકતના કેસની તપાસ દરમિયાન તેલંગાણાના સર્વે અને લેન્ડ રેકોર્ડ્સ વિભાગ, મલ્ટી-ઝોન-II ના ડેપ્યુટી ડાયરેક્ટર સુનકારી નરહરિ રાવના બેંક લોકરમાંથી 1.50 કરોડ રૂપિયા રોકડા જપ્ત કર્યા છે. એસીબીની આ કાર્યવાહી બાદ, આ મામલાએ વધુ ગંભીર વળાંક લીધો છે અને તપાસ એજન્સીને આરોપી અધિકારી પાસે જાહેર કરાયેલી આવક કરતા ઘણી વધુ સંપત્તિ હોવાના સંકેતો મળ્યા છે.

એસીબીના અધિકારીઓના જણાવ્યા અનુસાર, શનિવારે તપાસ ટીમ નરહરિ રાવને હૈદરાબાદના શાલીબંડા સ્થિત એક બેંકમાં લઈ ગઈ હતી. ત્યાં તેમના નામે ચાલતા લોકરને વિધિવત રીતે ખોલવામાં આવ્યું હતું. લોકરની તલાશી દરમિયાન તેમાંથી રાખવામાં આવેલી 1.50 કરોડ રૂપિયાની રોકડ મળી આવી હતી. રિકવર કરાયેલી રકમ જપ્ત કરીને આગળની તપાસ શરૂ કરવામાં આવી છે.

ઉલ્લેખનીય છે કે, એસીબીએ 16 જૂને નરહરિ રાવની ધરપકડ કરી હતી. ધરપકડ બાદ એજન્સીએ તેમની સામે અપ્રમાણસર મિલકત (ડિસપ્રપોશનેટ એસેટ્સ) નો ગુનો નોંધીને વ્યાપક તપાસ શરૂ કરી હતી. આ અંતર્ગત મંગળવારે હૈદરાબાદ અને તેની આસપાસના વિસ્તારોમાં તેમની સાથે જોડાયેલા 10 સ્થળો પર એક સાથે દરોડા પાડવામાં આવ્યા હતા.

સર્ચ ઓપરેશન દરમિયાન તપાસ એજન્સીને મોટી માત્રામાં જંગમ અને સ્થાવર મિલકતો સંબંધિત દસ્તાવેજો મળી આવ્યા હતા. પ્રાથમિક તપાસમાં હૈદરાબાદ અને તેની આસપાસના વિસ્તારોમાં અનેક મોંઘા પ્લોટ, ફ્લેટ અને અન્ય મિલકતો હોવાનું બહાર આવ્યું છે. આ સિવાય મોટી માત્રામાં સોના-ચાંદીના દાગીના, રોકાણ સંબંધિત કાગળો અને અન્ય નાણાકીય દસ્તાવેજો પણ મળી આવ્યા છે.

એસીબીના અધિકારીઓનું કહેવું છે કે, અત્યાર સુધીની તપાસમાં નરહરિ રાવ સાથે જોડાયેલી 30 કરોડ રૂપિયાથી વધુની સંપત્તિની ભાળ મળી છે. જોકે, બેંક લોકરમાંથી રોકડ મળી આવ્યા બાદ અને વિવિધ દસ્તાવેજોની ઝીણવટભરી તપાસ બાદ એવી આશંકા વ્યક્ત કરવામાં આવી રહી છે કે તેમની કુલ સંપત્તિનું મૂલ્ય 100 કરોડ રૂપિયાથી પણ વધુ હોઈ શકે છે. એજન્સી મિલકતોના વાસ્તવિક મૂલ્યાંકન અને તેના સ્ત્રોતોની તપાસ કરી રહી છે.

તપાસ અધિકારીઓના જણાવ્યા અનુસાર, જપ્ત કરાયેલા દસ્તાવેજોની તપાસ કરવામાં આવી રહી છે, જેથી એ જાણી શકાય કે આ મિલકતો કેવી રીતે મેળવવામાં આવી હતી અને શું તેમાં કોઈ બેનામી રોકાણ અથવા અન્ય વ્યક્તિઓની ભૂમિકા પણ સામેલ છે. આ માટે બેંક ખાતાઓ, રોકાણના રેકોર્ડ અને મિલકતની ખરીદી અને વેચાણ સંબંધિત દસ્તાવેજોની પણ તપાસ કરવામાં આવી રહી છે.

એસીબીએ જણાવ્યું છે કે, આ મામલાની તપાસ હજુ ચાલુ છે અને તપાસ દરમિયાન સામે આવેલા તથ્યોના આધારે આગળની કાનૂની કાર્યવાહી કરવામાં આવશે. એજન્સીનું માનવું છે કે, આગામી દિવસોમાં આ કેસમાં વધુ મહત્વના ખુલાસા થઈ શકે છે.

હિન્દુસ્થાન સમાચાર / દેવ કુમાર પુખરાજ / ઉદય કુમાર સિંહ

હિન્દુસ્થાન સમાચાર / ડો.હિતેશ એન.વ્યાસ