કોલ્હાપુર, નવી દિલ્હી, 20 જૂન (હિ.સ.). મહારાષ્ટ્રના કોલ્હાપુરમાં સ્થિત સુપ્રસિદ્ધ શ્રી મહાલક્ષ્મી મંદિરના પુનરોદ્ધારના એક પ્રોજેક્ટનો આજે અહીં શુભારંભ કરવામાં આવ્યો.

કેન્દ્રીય ગૃહ અને સહકારિતા મંત્રી અમિત શાહે, રાજ્યના મુખ્યમંત્રી દેવેન્દ્ર ફડણવીસ અને નાયબ મુખ્યમંત્રી એકનાથ શિંદેની ઉપસ્થિતિમાં 1445.97 કરોડ રૂપિયાના કરવીર નિવાસિની શ્રી અંબાબાઈ મંદિરના સંરક્ષણ, સંવર્ધન અને પરિસર વિકાસ પ્રોજેક્ટની શરૂઆત કરી. આ પહેલાં ગૃહ મંત્રી અમિત શાહે તેમના પત્ની સાથે શ્રી અંબાબાઈના દર્શન કર્યા અને વિધિવત પૂજા-અર્ચના કરી. ત્યારબાદ રામ મંદિરમાં ઉત્સવમૂર્તિની પૂજા કરવામાં આવી.

ત્યારબાદ મંદિર પરિસરમાં વિવિધ વિકાસ કાર્યોના શિલાન્યાસનું અનાવરણ પણ કરવામાં આવ્યું. આ પ્રસંગે જિલ્લા કલેક્ટર ડૉ. વિજય રાઠોડે નવા પરિક્રમા માર્ગ સહિત મુખ્ય મંદિરના સંરક્ષણ, સંવર્ધન અને વિકાસ કાર્યોની પ્રસ્તુતિ રજૂ કરી.

આ કાર્યક્રમમાં રાજ્ય મંત્રીમંડળમાં કોલ્હાપુરના પાલક મંત્રી પ્રકાશ આબિટકર, મંત્રી ચંદ્રકાંત પાટીલ, હસન મુશ્રીફ, એડવોકેટ આશિષ શેલાર, સંજય સાવકારે, મકરંદ પાટીલ, માધુરી મિસાલ સહિત અનેક જનપ્રતિનિધિઓ અને વરિષ્ઠ વહીવટી અધિકારીઓ ઉપસ્થિત રહ્યા હતા.

રાજ્ય મંત્રીમંડળે ગત વર્ષે 6 મેના રોજ આ વિકાસ પ્રોજેક્ટને મંજૂરી આપી હતી. પ્રથમ તબક્કામાં 143.90 કરોડ રૂપિયાના કાર્યો શરૂ કરવામાં આવી રહ્યા છે, જેમાં મંદિરનું સંરક્ષણ, સમારકામ, વીજળીકરણ, સીસીટીવી સિસ્ટમ અને લાઇટિંગ સિસ્ટમનું નવીનીકરણ કરવામાં આવી રહ્યું છે.

આ યોજના અંતર્ગત દર્શન મંડપ, અન્નછત્ર, માહિતી કેન્દ્ર, વેદપાઠશાળા, ભોજનગૃહ, મલ્ટીપર્પઝ હોલ, સુરક્ષા વ્યવસ્થા, પ્રાથમિક સારવાર કેન્દ્ર, વાહન પાર્કિંગ, દુકાનો, એમ્ફીથિયેટર સહિત વિવિધ સુવિધાઓનું નિર્માણ કરવામાં આવશે. આ ઉપરાંત પરિસરમાં આવેલા 41 નાના-મોટા મંદિરોનું સંરક્ષણ અને નગર પરિક્રમા માર્ગનું સૌંદર્યીકરણ પણ કરવામાં આવશે.

કોલ્હાપુરનું શ્રી મહાલક્ષ્મી મંદિર ભારતના પ્રાચીન, જાગૃત અને અગ્રણી શક્તિપીઠો પૈકીનું એક માનવામાં આવે છે. આશરે એક હજાર વર્ષથી વધુનો ઇતિહાસ ધરાવતા આ મંદિરનો ઉલ્લેખ વિવિધ પુરાણો અને ઐતિહાસિક ગ્રંથોમાં જોવા મળે છે. હેમાડપંથી સ્થાપત્ય શૈલી, સમૃદ્ધ શિલ્પકળા અને ધાર્મિક પરંપરાઓનો અજોડ સંગમ ધરાવતું આ મંદિર દેશ-વિદેશના લાખો શ્રદ્ધાળુઓની આસ્થાનું કેન્દ્ર છે.

મંદિર પરિસરમાં માળખાકીય સુવિધાઓનું આધુનિકીકરણ, હેરિટેજ સંરક્ષણ, શ્રદ્ધાળુઓ માટે આધુનિક સુવિધાઓ અને પ્રવાસન વિકાસ—આ તમામ પાસાઓને ધ્યાનમાં રાખીને આ યોજના અમલમાં મૂકવામાં આવી રહી છે. વિકાસ અને હેરિટેજ સંરક્ષણના સંતુલન સાથે આ પ્રોજેક્ટ પૂર્ણ થતાં મંદિર પરિસરની ભવ્યતા વધુ વધશે અને શ્રદ્ધાળુઓને વધુ સુગમ, સુરક્ષિત અને આધુનિક સુવિધાઓ ઉપલબ્ધ થશે.

હિન્દુસ્થાન સમાચાર / મનીષ કુલકર્ણી / રામાનુજ શર્મા / સચિન બુધૌલિયા

હિન્દુસ્થાન સમાચાર / ડો.હિતેશ એન.વ્યાસ