ભાવનગર, 20 જૂન (હિ.સ.) : ભાવનગર શહેરના 150 ફૂટ રિંગ રોડ વિસ્તારમાં આવેલી લાલાપાર્ક સોસાયટીમાં નજીવી બાબતે શરૂ થયેલો વિવાદ હિંસક સ્વરૂપ ધારણ કરતાં એક ડેપ્યુટી એન્જિનિયર પર તેમના જ પાડોશીએ હુમલો કર્યો હોવાની ઘટના સામે આવી છે. આ બનાવ અંગે ભરતનગર પોલીસ મથકમાં ફરિયાદ નોંધાતા પોલીસે આરોપી સામે ગુનો નોંધી વધુ તપાસ હાથ ધરી છે.

પ્રાપ્ત માહિતી અનુસાર, લાલાપાર્ક સોસાયટીમાં રહેતા અને વીજ કંપનીના હિલડ્રાઈવ સબ ડિવિઝનમાં ડેપ્યુટી એન્જિનિયર તરીકે ફરજ બજાવતા મહેશ ચુડાસમાના પુત્ર અને સોસાયટીમાં જ રહેતા રાકેશ સોંડાગરના પુત્ર વચ્ચે સાયકલ ચલાવવા બાબતે સામાન્ય બોલાચાલી થઈ હતી. બાળકો વચ્ચે થયેલી આ તકરાર બાદ બંને પરિવારો વચ્ચે પણ બોલાચાલી સર્જાઈ હતી. આ દરમિયાન રાકેશ સોંડાગરની પત્નીએ મહેશભાઈની પત્નીને ઠપકો આપતાં મામલો વધુ ઉગ્ર બન્યો હતો.

આ ઘટનાની દાઝ રાખીને રાત્રિના સમયે રાકેશ સોંડાગર લોખંડની પાઇપ લઈને મહેશભાઈના ઘરે ધસી આવ્યો હતો. ફરિયાદ મુજબ, તેણે મહેશભાઈ પર આડેધડ ઘા ઝીંકી ગંભીર ઇજાઓ પહોંચાડવાનો પ્રયાસ કર્યો હતો. હુમલા દરમિયાન આરોપીએ મહેશભાઈને જાનથી મારી નાખવાની ધમકી પણ આપી હોવાનું જણાવાયું છે. હુમલામાં ઇજાગ્રસ્ત બનેલા મહેશ ચુડાસમાએ સમગ્ર ઘટનાની જાણ ભરતનગર પોલીસને કરી હતી. તેમની ફરિયાદના આધારે પોલીસે આરોપી રાકેશ સોંડાગર સામે સંબંધિત કલમો હેઠળ ગુનો નોંધી કાયદેસરની કાર્યવાહી શરૂ કરી છે.

સામાન્ય રીતે બાળકો વચ્ચેના નાના વિવાદો ક્યારેક વડીલોની હસ્તક્ષેપના કારણે ગંભીર સ્વરૂપ ધારણ કરતા હોય છે. લાલાપાર્ક સોસાયટીમાં બનેલી આ ઘટના પણ એ જ પ્રકારનું ઉદાહરણ બની છે, જ્યાં સાયકલ ચલાવવાની સામાન્ય બાબત આખરે હુમલા અને પોલીસ ફરિયાદ સુધી પહોંચી ગઈ છે. પોલીસે સમગ્ર મામલે વધુ તપાસ શરૂ કરી છે.

---------------

હિન્દુસ્થાન સમાચાર / DISHANT NANDRAMBHAI GONADLIYA