નવી દિલ્હી, 21 જૂન (હિ.સ.) નીટની પુનઃપરીક્ષા અંગે કેન્દ્રીય શિક્ષણ મંત્રી ધર્મેન્દ્ર પ્રધાને રવિવારે જણાવ્યું હતું કે, વિદ્યાર્થીઓ સંપૂર્ણપણે નિર્ભય અને ચિંતામુક્ત થઈને પરીક્ષા આપે. ધર્મેન્દ્ર પ્રધાને આ વાત દિલ્હી યુનિવર્સિટી (ડીયુ) દ્વારા બેનિટો જુઆરેઝ માર્ગ સ્થિત દક્ષિણ કેમ્પસમાં આયોજિત 12મા આંતરરાષ્ટ્રીય યોગ દિવસના અવસરે કહી હતી.

કાર્યક્રમ બાદ પત્રકારો સાથેની વાતચીતમાં શિક્ષણ મંત્રીએ નીટ પરીક્ષા અંગે મીડિયાને જણાવ્યું કે, આજે નીટની પુનઃપરીક્ષા યોજાવા જઈ રહી છે. મને એનટીએ, રાજ્ય સરકારો, જિલ્લા વહીવટીતંત્ર અને દેશના શિક્ષણ જગત પર સંપૂર્ણ વિશ્વાસ છે. આશરે 22 લાખ વિદ્યાર્થીઓ આ પરીક્ષામાં સામેલ થઈ રહ્યા છે. તેઓ સંપૂર્ણપણે નિર્ભય અને ચિંતામુક્ત થઈને પરીક્ષા આપે. મારી શુભેચ્છાઓ તેમની સાથે છે.

મુખ્ય અતિથિ તરીકે ધર્મેન્દ્ર પ્રધાને જણાવ્યું હતું કે, વર્તમાન સમયમાં સમગ્ર વિશ્વ માનસિક તણાવ અને શારીરિક ફિટનેસ જેવી ગંભીર સ્વાસ્થ્ય પડકારોનો સામનો કરી રહ્યું છે. આ તમામ સમસ્યાઓનો અચૂક ઉકેલ આપણા પ્રાચીન યોગ વિજ્ઞાનમાં રહેલો છે.

તેમણે વડાપ્રધાન નરેન્દ્ર મોદીના પ્રયાસોની પ્રશંસા કરતા કહ્યું કે, ભારતીય સભ્યતાની આ પ્રાચીન પરંપરાને છેલ્લા એક દાયકામાં વૈશ્વિક પટલ પર સ્થાપિત કરવામાં આવી છે. શિક્ષણ મંત્રીએ વિદ્યાર્થીઓ અને સામાન્ય લોકોને અપીલ કરી હતી કે તેઓ દિવસભરમાં ઓછામાં ઓછી 10 મિનિટ યોગ માટે ચોક્કસ ફાળવે. જો આપણે વર્ષના 365 દિવસ યોગ કરીશું, તો જ સ્વસ્થ રહીને વિશ્વની સેવા કરી શકીશું.

કેન્દ્રીય મંત્રીએ, ક્યુએસ વર્લ્ડ યુનિવર્સિટી રેન્કિંગ 2027 માં દિલ્હી યુનિવર્સિટીના શાનદાર પ્રદર્શન પર ખુશી વ્યક્ત કરતા જણાવ્યું કે, થોડા વર્ષો પહેલા સુધી ડીયુ 600મા ક્રમના બ્રેકેટમાં હતું, જે હવે સુધરીને 322મા સ્થાને આવી ગયું છે. તેમણે યુનિવર્સિટીને આગામી વર્ષોમાં વિશ્વની ટોચની 100 યુનિવર્સિટીઓમાં સ્થાન મેળવવાનો પડકાર આપ્યો અને કહ્યું કે, 'વિકસિત ભારત'ના નિર્માણમાં ડીયુનું નેતૃત્વ અત્યંત મહત્વપૂર્ણ રહેશે.

દિલ્હી યુનિવર્સિટીના કુલપતિ પ્રો. યોગેશ સિંહે પોતાના અધ્યક્ષીય પ્રવચનમાં જણાવ્યું હતું કે, ભારત દ્વારા માનવતાને આપવામાં આવેલી સૌથી મોટી ભેટ યોગ અને આયુર્વેદ છે. યોગ શરીર, મન, બુદ્ધિ અને આત્મા વચ્ચે સંતુલન જાળવે છે. તેમણે કહ્યું કે, સામાન્ય રીતે મનુષ્યનું મન ચંચળ અને શરીર આરામપ્રિય હોય છે, પરંતુ યોગ મનને સ્થિર અને શરીરને ગતિશીલ બનાવીને વ્યક્તિને આત્મ-નિયંત્રિત કરે છે.

શિક્ષણવિદો અને શિક્ષિત લોકોમાં કરુણાના અભાવ અંગે ચિંતા વ્યક્ત કરતા કુલપતિએ જણાવ્યું હતું કે, યોગ આપણને સ્પર્ધા વચ્ચે પણ કરુણા અને સહયોગની ભાવના શીખવે છે.

આ પ્રસંગે ઉચ્ચ શિક્ષણ સચિવ ડૉ. વિનીત જોશી, શાળા શિક્ષણ સચિવ સંજય કુમાર, ડીયુના ડીન ઓફ કોલેજીસ પ્રો. બલરામ પાણિ, દક્ષિણ કેમ્પસના નિયામક પ્રો. રજની અબ્બી, સીઓએલના નિયામક પ્રો. પાયલ માગો સહિત શિક્ષકો, બિન-શૈક્ષણિક કર્મચારીઓ અને વિદ્યાર્થીઓ ઉપસ્થિત રહ્યા હતા.

હિન્દુસ્થાન સમાચાર / શ્રદ્ધા દ્વિવેદી / અનૂપ શર્મા

હિન્દુસ્થાન સમાચાર / માધવી વ્યાસ