વડોદરા, 21 જૂન (હિ.સ.) : વડોદરાના માંજલપુર વિસ્તારમાંથી એક ચોંકાવનારી અને હૃદયધ્રુજાવનારી ઘટના સામે આવી છે. માંજલપુરની વ્યસ્ત ગણાતી સાંઈ ચોકડી પાસે રસ્તા પર દોડતી એક ચાલુ કારમાં મોડી રાત્રે અચાનક જ ભયાનક આગ ભભૂકી ઉઠી હતી. ભરચક અને ટ્રાફિકથી ધમધમતા આ વિસ્તારમાં ચાલુ કાર સળગતી જોઈને રસ્તા પરથી પસાર થતા અન્ય વાહનચાલકો અને સ્થાનિક લોકોમાં ભારે હોબાળો અને અફરાતફરીનો માહોલ સર્જાયો હતો. સમયસૂચકતાથી બચ્યો જીવકારમાં આગ લાગતાં જ તેમાં સવાર લોકોએ અદભુત સમયસૂચકતા દાખવી હતી. કારમાંથી ધુમાડો નીકળતો જોઈને ડ્રાઈવર અને અન્ય મુસાફરો તાત્કાલિક ગાડી ઊભી રાખીને બહાર કૂદી પડ્યા હતા. લોકો સમયસર વાહનમાંથી બહાર નીકળી જવાને કારણે સદનસીબે કોઈને પણ નાની-મોટી ઈજા થઈ નથી અને ખૂબ જ મોટી જાનહાનિ થતાં અટકી ગઈ છે.

જોકે, આગ એટલી ભીષણ હતી કે જોતજોતામાં આખી કાર આગની લપેટમાં આવી ગઈ હતી અને આકાશમાં ધુમાડાના ગોટેગોટા ઉડતા જોવા મળ્યા હતા.ફાયર ફાઈટરોની ત્વરિત કામગીરીઆ ઘટના અંગે સ્થાનિકો અને પ્રત્યક્ષદર્શીઓ દ્વારા તાત્કાલિક ફાયર બ્રિગેડને ફોન કરીને જાણ કરવામાં આવી હતી. ઘટનાની ગંભીરતાને સમજીને વડોદરા ફાયર બ્રિગેડની ટીમ ફાયર ફાઈટરના જવાનો સાથે ગણતરીની મિનિટોમાં જ ઘટનાસ્થળે દોડી આવી હતી. ફાયરના જવાનોએ ભારે જહેમત અને પાણીનો મારો ચલાવીને કારમાં લાગેલી આગ પર સંપૂર્ણ રીતે કાબૂ મેળવ્યો હતો. જોકે, આગ સંપૂર્ણ હોલવાય ત્યાં સુધીમાં કાર બળીને કબાડ થઈ ગઈ હતી.પોલીસ કાફલો ઘટનાસ્થળે અને તપાસ શરૂભરચક ચાર રસ્તા પર આગના કારણે મોટો ટ્રાફિક જામ થઈ ગયો હતો. ઘટનાની જાણ થતાં જ સ્થાનિક પોલીસનો કાફલો પણ ઘટનાસ્થળે પહોંચી ગયો હતો. પોલીસે ત્યાં આવીને તરત જ કાયદો અને વ્યવસ્થા જાળવી રાખવા માટે ટ્રાફિક ક્લિયર કરાવવાની કામગીરી હાથ ધરી હતી અને રસ્તા પરનો વાહનવ્યવહાર ફરી પૂર્વવત કરાવ્યો હતો.

કારમાં આગ લાગવાનું પ્રાથમિક કારણ શોર્ટ સર્કિટ હોવાનું અનુમાન લગાવવામાં આવી રહ્યું છે, પરંતુ કોઈ યાંત્રિક ખામી હતી કે કેમ તે અંગે સ્થાનિક પોલીસ અને વહીવટી તંત્ર દ્વારા વધુ તપાસ શરૂ કરવામાં આવી છે. મુસાફરોના સમયસરના બચાવને લીધે સમગ્ર વહીવટી તંત્ર અને સ્થાનિક લોકોએ રાહતનો શ્વાસ લીધો છે.

---------------

હિન્દુસ્થાન સમાચાર / અમિત શાહ