કચ્છ, 22 જૂન (હિ.સ.) ભચાઉ વિસ્તારમાં પોકસો અધિનિયમ હેઠળ નોંધાયેલા ગંભીર ગુનામાં ભચાઉ પોલીસે ચપળતા અને વ્યાવસાયિક કુશળતાનું ઉત્તમ ઉદાહરણ પૂરું પાડ્યું છે. ઘટનાની ફરિયાદ નોંધાયા બાદ પોલીસ તંત્ર તાત્કાલિક હરકતમાં આવ્યું હતું અને આધુનિક ટેકનિકલ સાધનો તેમજ માનવ ગુપ્તચર માહિતીના આધારે આરોપીને ગણતરીના કલાકોમાં શોધી કાઢી કાયદાની જાળમાં લાવી દીધો હતો.

પૂર્વ કચ્છ જિલ્લામાં મહિલા અને બાળ સુરક્ષા સંબંધિત ગુનાઓને રોકવા તથા આવા ગુનાઓમાં સંડોવાયેલા આરોપીઓને ઝડપથી પકડી પાડવા માટે ભચાઉ પોલીસ સ્ટેશનમાં નોંધાયેલા પોકસો સંબંધિત ગુનાની ગંભીરતા ધ્યાનમાં રાખીને તપાસની કાર્યવાહી યુદ્ધના ધોરણે શરૂ કરવામાં આવી હતી.

પોલીસે મળેલા પ્રાથમિક પુરાવા, ટેક્નિકલ સર્વેલન્સ અને વિવિધ સૂત્રો પાસેથી પ્રાપ્ત થયેલી માહિતીના આધારે આરોપી રસદામ રહીમતુલ્લા ખલીફાની હિલચાલ પર નજર રાખી હતી. તપાસ દરમિયાન મળેલી મહત્વપૂર્ણ કડીઓના આધારે પોલીસે આરોપીને ઝડપી પાડી તેની સામે કાયદેસરની કાર્યવાહી હાથ ધરી હતી.

આ સમગ્ર ઓપરેશન દરમિયાન ભચાઉ પોલીસ સ્ટેશનના પોલીસ ઇન્સ્પેક્ટર ડી.ડી. ઝાલાના માર્ગદર્શન હેઠળ સર્વેલન્સ સ્ટાફ અને પોલીસ ટીમે સંકલિત પ્રયાસો કર્યા હતા. પોલીસની આ ઝડપી કામગીરીને કારણે ગંભીર ગુનામાં સંડોવાયેલા આરોપીને ભાગવાની કોઈ તક મળી નહોતી અને ટૂંકા સમયમાં જ તેની ધરપકડ શક્ય બની હતી.

સ્થાનિક લોકોમાં પણ પોલીસની આ સતર્ક અને ઝડપી કામગીરીને લઈને સંતોષની લાગણી જોવા મળી રહી છે. બાળ સુરક્ષા અને મહિલા સુરક્ષા સંબંધિત કેસોમાં પોલીસ દ્વારા દાખવવામાં આવતી ત્વરિત કાર્યવાહી સમાજમાં કાયદા પ્રત્યેનો વિશ્વાસ વધુ મજબૂત બનાવે છે. ભચાઉ પોલીસની આ કામગીરી ફરી એકવાર દર્શાવે છે કે ગંભીર ગુનાઓ સામે કડક વલણ અપનાવી આરોપીઓને ઝડપથી કાયદાના કટઘરામાં લાવવાની દિશામાં પોલીસ તંત્ર સતત સજ્જ છે.

હિન્દુસ્થાન સમાચાર / Rohit Ramjibhai Padhiyar