સુરત, 22 જૂન (હિ.સ.) : સુરતના સિંગણપોર વિસ્તારમાં અંધશ્રદ્ધાનો લાભ લઈ મહિલાઓને જાળમાં ફસાવનાર એક કથિત તાંત્રિક સામે ગંભીર આરોપો સામે આવ્યા છે. પોલીસે નરેશ ચૌહાણ ઉર્ફે નરેશ ભુવાની ધરપકડ કરી છે. ફરિયાદ મુજબ, તેણે એક યુવતીને ધાર્મિક આશીર્વાદ અને પ્રસાદના બહાને હોટેલમાં બોલાવી હતી, જ્યાં નશીલો પદાર્થ આપ્યા બાદ તેની સાથે દુષ્કર્મ કર્યાનો આરોપ છે. ઘટનાના સમયે યુવતીના અશ્લીલ ફોટા પણ પાડવામાં આવ્યા હોવાનું કહેવામાં આવ્યું છે. આરોપી બાદમાં તે ફોટાઓ વાયરલ કરવાની ધમકી આપી યુવતીને સતત બ્લેકમેલ કરતો રહ્યો હતો. ફરિયાદ અનુસાર, છેલ્લા એક વર્ષ દરમિયાન તેણે અનેક વખત યુવતીને હોટેલમાં બોલાવી તેની મરજી વિરુદ્ધ શારીરિક શોષણ કર્યું હતું. સતત ધમકીઓ અને માનસિક દબાણને કારણે પીડિતા ભારે તણાવમાં જીવતી રહી હતી.

આ સમગ્ર ઘટનાની અસર યુવતીના લગ્નજીવન પર પણ પડી હતી. લગ્ન પછી પણ આરોપી ફોન અને મેસેજ દ્વારા સંપર્ક કરી ધમકાવતો રહ્યો હતો. તેના કારણે પતિને શંકા જતાં દાંપત્ય જીવનમાં વિખવાદ સર્જાયો હતો. અંતે પીડિતાએ પરિવારને સમગ્ર હકીકત જણાવી અને ત્યારબાદ પોલીસનો સંપર્ક કરવામાં આવ્યો હતો.

પોલીસ તપાસમાં સામે આવ્યું છે કે આરોપી ભાડાના મકાનમાં રહેતો હોવા છતાં સોશિયલ મીડિયા પર વૈભવી જીવનશૈલી દર્શાવતો હતો. મોંઘી કારો સાથેના વીડિયો અને રીલ્સ દ્વારા તે પોતાને પ્રભાવશાળી અને સમૃદ્ધ વ્યક્તિ તરીકે રજૂ કરતો હતો. તપાસ એજન્સીઓને શંકા છે કે અન્ય યુવતીઓ પણ તેના શિકાર બની હોઈ શકે છે. હાલ પોલીસે વધુ તપાસ શરૂ કરી છે અને અન્ય સંભવિત પીડિતાઓ અંગે માહિતી એકત્ર કરી રહી છે.

---------------

હિન્દુસ્થાન સમાચાર / યજુવેન્દ્ર દુબે