નવી દિલ્હી, 23 જૂન (હિ.સ.) પ્રધાનમંત્રી નરેન્દ્ર મોદીએ, મંગળવારે ડૉ. શ્યામા પ્રસાદ મુખર્જીના બલિદાન દિવસે તેમને શ્રદ્ધાંજલિ અર્પતાં કહ્યું કે, રાષ્ટ્રહિત પ્રત્યે તેમનું સમર્પણ, સાહસ અને વિચાર આજે પણ દેશવાસીઓને પ્રેરણા આપે છે.

પ્રધાનમંત્રીએ સોશિયલ મીડિયા પ્લેટફોર્મ એક્સ પર પોસ્ટ કરીને કહ્યું કે, ડૉ. શ્યામા પ્રસાદ મુખર્જી એક મહાન રાષ્ટ્રભક્ત, વિદ્વાન અને દૂરદર્શી રાજનેતા હતા, જેમણે પોતાનું સમગ્ર જીવન ભારતના વિકાસ અને રાષ્ટ્રીય એકતા માટે સમર્પિત કર્યું. તેમણે કહ્યું કે, જાહેર જીવનમાં તેમની અડગ નિષ્ઠા, સાહસ અને રાષ્ટ્રહિત પ્રત્યેની પ્રતિબદ્ધતા આવનારી પેઢીઓને પ્રેરણા આપતી રહેશે.

પ્રધાનમંત્રીએ કહ્યું કે, ડૉ. મુખર્જીનું બલિદાન દેશની સામૂહિક સ્મૃતિમાં સદૈવ અંકિત રહેશે અને વિકસિત તથા સશક્ત ભારતના નિર્માણ માટે તેમના આદર્શો પર ચાલવાનો સંકલ્પ પુનરાવર્તિત કરવો જોઈએ.

પ્રધાનમંત્રી મોદીએ અન્ય એક પોસ્ટમાં સંસ્કૃત સુભાષિત શેર કરતાં કહ્યું કે, રાષ્ટ્ર અને સમાજની નિઃસ્વાર્થ સેવા માટે જીવનભર સમર્પિત રહેલા ડૉ. મુખર્જીના પ્રખર વિચાર અને આદર્શ દેશની દરેક પેઢીને માતૃભૂમિની સેવા માટે પ્રેરિત કરતા રહેશે.

પ્રધાનમંત્રી મોદીએ સંસ્કૃત સુભાષિત શેર કરીને લખ્યું કે,

न कर्मणा न प्रजया धनेन त्यागेनैके अमृतत्वमानशुः।परेण नाकं निहितं गुहायां विभ्राजते यद्यतयो विशन्ति॥

આ સુભાષિતનો અર્થ છે કે, મનુષ્યને ન તો માત્ર કર્મો, ન સંતાનો અને ન જ ધન-સંપત્તિથી અમરત્વ અથવા સર્વોચ્ચ ગૌરવ પ્રાપ્ત થાય છે, પરંતુ ત્યાગ દ્વારા જ ઉચ્ચતમ આદર્શોની પ્રાપ્તિ શક્ય છે. જે લોકો નિઃસ્વાર્થ ભાવથી ત્યાગ અને તપસ્યાનો માર્ગ અપનાવે છે, તેઓ સત્ય અને પરમ કલ્યાણની તે અવસ્થાને પ્રાપ્ત કરે છે, જે માનવ જીવનનું સર્વોચ્ચ લક્ષ્ય છે.

પ્રધાનમંત્રીએ કહ્યું કે, ડૉ. શ્યામા પ્રસાદ મુખર્જીનું જીવન ત્યાગ, રાષ્ટ્રસેવા અને સમર્પણનું અનન્ય ઉદાહરણ છે, જે દેશવાસીઓને સદૈવ પ્રેરણા આપતું રહેશે.

હિન્દુસ્થાન સમાચાર / માધવી ત્રિપાઠી / સંજીવ પાશ

હિન્દુસ્થાન સમાચાર / માધવી વ્યાસ