મુંબઈ, નવી દિલ્હી, 24 જૂન (હિ.સ.) મુંબઈ સહિત મહારાષ્ટ્રના અનેક શહેરોમાં બુધવારે વહેલી સવારથી થઈ રહેલા ભારે વરસાદને કારણે ઘણા વિસ્તારોમાં જળભરાવો થયો છે. ભારતીય હવામાન વિભાગે આજે મુંબઈ, પાલઘર જિલ્લાઓમાં રેડ એલર્ટ જાહેર કર્યું છે, જેના કારણે આ જિલ્લાઓમાં તેજ પવન સાથે ભારે વરસાદની સંભાવના છે. ભારે વરસાદને કારણે રસ્તાઓ પર થયેલા જળભરાવથી કામકાજી લોકોને ભારે સમસ્યાઓનો સામનો કરવો પડી રહ્યો છે.

મુંબઈ શહેરના મેયર રીતુ તાવડેએ આજે જણાવ્યું કે, મુંબઈમાં કુલ 208 મિલીમીટર (મિમી) વરસાદ નોંધાયો છે. જેમાં મુંબઈ પશ્ચિમ ઉપનગરમાં 195 અને મુંબઈ પૂર્વ ઉપનગરમાં 167 મિમી વરસાદ નોંધાયો છે. આના કારણે મુંબઈના ઘણા વિસ્તારો જળમગ્ન છે, અને દરેક જગ્યાએ પમ્પિંગના સહયોગથી પાણી નિકાલનું કામ ચાલુ છે. મેયરે જણાવ્યું કે સાયન, કિંગસર્કલ, દાદર, લાલબાગ, અંધેરી સબવે, સાન્તાક્રુઝ સબવે સહિતના ઘણા વિસ્તારો હજુ પણ જળમગ્ન છે, જ્યારે સાયનના ગાંધીનગરમાં પાણીનો નિકાલ કરી દેવામાં આવ્યો છે. મેયરે એમ પણ કહ્યું કે ઓછા સમયમાં વધુ વરસાદને કારણે જળભરાવની સમસ્યા સામે આવી છે, જેના નિરાકરણનો પ્રયાસ નજીકના ભવિષ્યમાં કરવામાં આવશે.

ભારે વરસાદને કારણે મુંબઈ શહેરની લાઇફલાઇન ગણાતી લોકલ ટ્રેન સેવા, વાશી ટ્રાન્સ હાર્બર સેવા, મેટ્રો સેવા સાથે રસ્તાઓ પરની બસ સેવા અને વાહનવ્યવહાર પ્રભાવિત થયો છે. જોકે, આ સેવાઓ ઘણી જહેમત બાદ ફરી શરૂ થઈ ગઈ છે.

ભારતીય હવામાન વિભાગે આજે મુંબઈ, રત્નાગિરી અને પાલઘર જિલ્લાઓ માટે રેડ એલર્ટ અને થાણે, રાયગઢ, સિંધુદુર્ગ જિલ્લાઓ માટે ઓરેન્જ એલર્ટ જાહેર કર્યું છે. આ સાથે આજે સમુદ્રમાં 3.41 મીટરનો ભરતી પણ આવવાની સાથે 80 કિલોમીટરથી પણ વધુ તેજ પવન સાથે ભારે વરસાદની ચેતવણી હવામાન વિભાગે આપી છે. આ ચેતવણી બાદ આ જિલ્લાઓના જિલ્લાધિકારીઓને વહીવટીતંત્ર તરફથી સતર્ક રહેવાની સૂચના આપવામાં આવી છે.

હવામાન વિભાગે જણાવ્યું કે, છેલ્લા 24 કલાકમાં મુંબઈના રામમંદિરમાં 224 મિમી, કુલાબામાં 218.5 મિમી, સાન્તાક્રુઝમાં 210.6 મિમી, સાયનમાં 182.5 મિમી, વિક્રોલીમાં 181.7 મિમી, વિદ્યાવિહારમાં 180.7 મિમી અને ચેમ્બુરમાં 180.7 વરસાદ નોંધાયો છે.

સ્થાનિક સૂત્રોએ જણાવ્યું કે, મુંબઈ અને પશ્ચિમી ઉપનગરોમાં અડધી રાતથી થઈ રહેલા ભારે વરસાદને કારણે દાદર અને કિંગ સર્કલ વિસ્તારમાં પાર્ક કરેલી કાર પર ઝાડ પડ્યું, જેનાથી કારને નુકસાન થયું. મુંબઈ નગર નિગમની ટીમે ઝાડ હટાવી દીધું છે, તેવી જ રીતે વિક્રોલી વિસ્તારમાં ભારે વરસાદને કારણે એક ઘરની દીવાલ પડી ગઈ, પરંતુ આ ઘટનામાં કોઈ જાનહાનિ થઈ નથી.

વસઈ વિરારમાં રાતથી જ ભારે વરસાદ થઈ રહ્યો છે. આના કારણે ઘણા નીચાણવાળા વિસ્તારોમાં પાણી ભરાઈ ગયું છે. નાલાસોપારાના સેન્ટ્રલ પાર્ક, તુલિંજ, સ્ટેશન વિસ્તાર, ગાલા નગર, અચોલે રોડની સાથે-સાથે વિરાર અને વસઈના ઘણા નીચાણવાળા વિસ્તારોમાં પાણી ભરાઈ ગયું છે. વરસાદ હજુ પણ ચાલુ છે. જો વરસાદની તીવ્રતા ચાલુ રહેશે તો નીચાણવાળા વિસ્તારોમાં રહેતા લોકોના ઘરોમાં પાણી પ્રવેશી શકે છે.

હિન્દુસ્થાન સમાચાર / રાજબહાદુર યાદવ / સંજીવ પાશ

હિન્દુસ્થાન સમાચાર / ડો.હિતેશ એન.વ્યાસ