કચ્છ, 25 જૂન (હિ.સ.) : ભચાઉ તાલુકામાં આવેલા એક મંદિરમાં થયેલી ચોરીની ઘટનાનો ભેદ ભચાઉ પોલીસે સફળતાપૂર્વક ઉકેલી આરોપીને ઝડપી પાડી કાયદેસરની કાર્યવાહી હાથ ધરી છે. પોલીસની સતર્ક કામગીરી અને આધુનિક તપાસ પદ્ધતિઓના કારણે ચોરીની આ ઘટનામાં સંડોવાયેલા યુવક સુધી પહોંચવામાં સફળતા મળી હતી.

પૂર્વ કચ્છ જિલ્લામાં મિલ્કત સંબંધિત ગુનાઓને અટકાવવા તેમજ નોંધાયેલા પરંતુ હજુ સુધી ઉકેલ ન થયેલા ગુનાઓને શોધી કાઢવા માટે ઉચ્ચ પોલીસ અધિકારીઓ દ્વારા સતત માર્ગદર્શન આપવામાં આવી રહ્યું છે. આ જ અભિયાનના ભાગરૂપે ભચાઉ પોલીસ સ્ટેશનમાં નોંધાયેલા મંદિર ચોરીના ગુનાની તપાસ હાથ ધરવામાં આવી હતી.

તપાસ દરમિયાન પોલીસ ટીમે ઘટનાસ્થળ આસપાસના સીસીટીવી ફૂટેજનું વિશ્લેષણ કર્યું હતું. સાથે જ ટેકનિકલ સર્વેલન્સ અને માનવ ગુપ્તચર સૂત્રોની મદદથી શંકાસ્પદ વ્યક્તિઓ અંગે માહિતી એકત્રિત કરવામાં આવી હતી. વિવિધ દિશામાં તપાસ આગળ વધાર્યા બાદ પોલીસને મહત્વપૂર્ણ કડીઓ મળી આવી હતી, જેના આધારે આરોપીની ઓળખ સ્થાપિત કરવામાં સફળતા મળી હતી.

પોલીસે વોંધ ગામના નદીવાસ વિસ્તારમાં રહેતા 22 વર્ષીય ગોવિંદ ઉર્ફે મઢો રણછોડભાઈ કોલીની, ધરપકડ કરી હતી. પૂછપરછ દરમિયાન આરોપી એ મંદિરમાંથી ચોરી કરવાનું કબૂલ્યું હતું. આરોપીની ધરપકડ બાદ સમગ્ર ઘટનાક્રમ અંગે વધુ તપાસ હાથ ધરવામાં આવી રહી છે.

ભચાઉ પોલીસના અધિકારીઓના જણાવ્યા મુજબ ચોરી જેવા મિલ્કત સંબંધિત ગુનાઓ સામે કડક કાર્યવાહી ચાલુ રાખવામાં આવશે અને આવા ગુનાઓમાં સંડોવાયેલા તત્વો સામે કાયદા મુજબ સખત પગલાં લેવામાં આવશે. આ સફળ કામગીરીથી સ્થાનિક લોકોમાં સુરક્ષાની ભાવના મજબૂત બની છે અને પોલીસની કામગીરીને લઈને વિશ્વાસ વધ્યો છે.

મંદિર જેવી આસ્થાના કેન્દ્રસ્થળે થયેલી ચોરીની ઘટનાનો ભેદ ઉકેલી આરોપીને ઝડપી પાડવામાં ભચાઉ પોલીસને મળેલી સફળતા ગુનાખોરી સામેની તેમની પ્રતિબદ્ધતાનું વધુ એક ઉદાહરણ બની છે.

---------------

હિન્દુસ્થાન સમાચાર / Rohit Ramjibhai Padhiyar