અમરેલી, 07 જૂન (હિ.સ.) : લાઠી તાલુકાના ભુરખીયા ગામે ગ્રામ્ય વિસ્તારના નાગરિકોને વધુ સારી અને સુલભ આરોગ્ય સેવાઓ ઉપલબ્ધ કરાવવા માટે મહત્વપૂર્ણ વિકાસ કાર્યનો પ્રારંભ કરવામાં આવ્યો છે. ગામ ખાતે અંદાજિત રૂ. 45 લાખના ખર્ચે નિર્માણ પામનાર આયુર્વેદિક હોસ્પિટલનું ખાતમુહૂર્ત સ્થાનિક ધારાસભ્ય જનકભાઈ તળાવીયાના હસ્તે વિધિવત રીતે સંપન્ન થયું હતું. આ હોસ્પિટલના નિર્માણથી ભુરખીયા સહિત આસપાસના અનેક ગામોના લોકોને પોતાના વિસ્તારની નજીક જ ગુણવત્તાસભર આરોગ્ય સેવાઓનો લાભ મળશે.

આયુર્વેદિક હોસ્પિટલમાં વિવિધ પ્રકારની આયુર્વેદ આધારિત સારવાર, આરોગ્ય માર્ગદર્શન, રોગપ્રતિકારક ઉપચાર તેમજ આરોગ્ય જાગૃતિ સંબંધિત સેવાઓ ઉપલબ્ધ બનશે. ગ્રામ્ય વિસ્તારોમાં આરોગ્ય માળખાને વધુ મજબૂત બનાવવા માટે રાજ્ય સરકાર સતત પ્રયાસ કરી રહી છે અને આ હોસ્પિટલ તે દિશામાં એક મહત્વપૂર્ણ પગલું સાબિત થશે.

ખાતમુહૂર્ત પ્રસંગે ધારાસભ્ય જનક તળાવીયાએ જણાવ્યું હતું કે રાજ્ય સરકાર ગામડાઓમાં આરોગ્ય, શિક્ષણ અને માળખાકીય સુવિધાઓના સર્વાંગી વિકાસ માટે પ્રતિબદ્ધ છે. તેમણે જણાવ્યું કે હોસ્પિટલનું નિર્માણ પૂર્ણ થયા બાદ સ્થાનિક લોકોને સારવાર માટે દૂર સુધી જવાની જરૂર નહીં રહે અને સમયસર આરોગ્ય સેવાઓ ઉપલબ્ધ બનશે. સાથે સાથે આયુર્વેદિક ચિકિત્સા પદ્ધતિ પ્રત્યે લોકોમાં વિશ્વાસ અને જાગૃતિ પણ વધશે.

કાર્યક્રમમાં ગામના આગેવાનો, સરપંચ, તાલુકા તથા જિલ્લા પંચાયતના સભ્યો, ભાજપના હોદ્દેદારો, કાર્યકરો તેમજ મોટી સંખ્યામાં ગ્રામજનો ઉપસ્થિત રહ્યા હતા. ઉપસ્થિત મહાનુભાવોએ આ વિકાસ કાર્યને આવકારી રાજ્ય સરકાર અને ધારાસભ્યનો આભાર વ્યક્ત કર્યો હતો.

ભુરખીયા ગામે નિર્માણ પામનારી આયુર્વેદિક હોસ્પિટલ સમગ્ર વિસ્તાર માટે આરોગ્ય ક્ષેત્રની એક મહત્વપૂર્ણ ભેટ સાબિત થશે. આ હોસ્પિટલના કાર્યરત બન્યા બાદ ગ્રામજનોને નજીકમાં જ સુલભ, ગુણવત્તાસભર અને પરંપરાગત આયુર્વેદિક સારવારનો લાભ મળી શકશે, જે ગ્રામ્ય આરોગ્ય વ્યવસ્થાને વધુ સશક્ત બનાવશે.

---------------

હિન્દુસ્થાન સમાચાર / Gondaliya Abhishek Nandrambhai