જૂનાગઢ, 10 જુલાઈ (હિ.સ.) : મેરા યુવા ભારત (MY Bharat) જૂનાગઢ, યુવા કાર્યક્રમ અને રમતગમત મંત્રાલય, ભારત સરકારની જિલ્લા સલાહકાર સમિતિની બેઠક કેન્દ્રીય યુવા બાબતો અને રમતગમત મંત્રી ડૉ. મનસુખ માંડવિયાની ઉપસ્થિતિમાં સર્કિટ હાઉસ ખાતે યોજાઈ હતી.

કેન્દ્રિય મંત્રી ડૉ. મનસુખભાઇ માંડવિયાએ સૌપ્રથમ ઉપસ્થિત તમામ સભ્યોને પ્રધાનમંત્રીના સંકલ્પ, MY Bharat પોર્ટલના ઉદ્દેશો, યુવાનો માટે ઉપલબ્ધ વિવિધ તકો તેમજ વિકસિત ભારત 2047ના નિર્માણમાં યુવાનોની મહત્વપૂર્ણ ભૂમિકા અંગે વિસ્તૃત માર્ગદર્શન આપ્યું હતું .હાલમાં ચાલી રહેલા સઘન યુવા નોંધણી અભિયાન તથા વાર્ષિક કાર્યયોજનાના અસરકારક અમલીકરણ અંગે પણ વિગતવાર ચર્ચા કરવામાં આવી હતી.

બેઠક દરમિયાન જિલ્લામાં યુવાનોની ભાગીદારી વધારવા, MY Bharat પોર્ટલ પર વધુમાં વધુ યુવાનોનું નોંધણીકરણ સુનિશ્ચિત કરવા, વિવિધ વિભાગો વચ્ચે સુમેળ વધારવા તથા સમયબદ્ધ અમલીકરણ અંગે વિસ્તૃત ચર્ચા કરવામાં આવી હતી. મંત્રીએ તમામ વિભાગો તથા સંબંધિત સંસ્થાઓને જિલ્લાના 15 થી 29 વર્ષના યુવાનોને MY Bharat પોર્ટલ સાથે જોડવા માટે વ્યાપક જાગૃતિ અને નોંધણી અભિયાન હાથ ધરવામાં આવે તે માટે જણાવ્યુ હતું. તેમણે વધુમા જણાવ્યું કે રાષ્ટ્ર નિર્માણમાં યુવાનોની સક્રિય ભાગીદારી સુનિશ્ચિત કરવી એ MY Bharatનું મુખ્ય ધ્યેય છે અને તે માટે તમામ વિભાગો, શૈક્ષણિક સંસ્થાઓ, ગ્રામ પંચાયતો તથા સામાજિક સંસ્થાઓના સંકલિત પ્રયાસો જરૂરી છે.

બેઠક દરમિયાન જિલ્લા યુવા અધિકારી મયંક ભદૌરિયાએ જિલ્લામાં અત્યાર સુધી કરવામાં આવેલા કાર્યો, MY Bharat પોર્ટલ પર નોંધણીની પ્રગતિ, આગામી પ્રવૃત્તિઓ તથા વાર્ષિક કાર્યયોજનાનું વિગતવાર પ્રસ્તુતીકરણ કર્યું હતું.

મંત્રીશ્રીએ જિલ્લાના તમામ મહાવિદ્યાલયો, યુનિવર્સિટીઓ, આઈટીઆઈ, પોલિટેકનિક સંસ્થાઓ, શાળાઓ, ગ્રામ પંચાયતો, યુવા મંડળો, એનએસએસ, એનસીસી, સ્વૈચ્છિક સંસ્થાઓ તથા અન્ય વિભાગો મારફતે યુવાનોને MY Bharat સાથે જોડવા માટે વિશેષ અભિયાન ચલાવવાના નિર્દેશ આપ્યા હતા .તેમણે વિવિધ વિભાગો વચ્ચે વધુ સારો સમન્વય સ્થાપિત કરીને કૌશલ્ય વિકાસ, સ્વયંસેવા, પર્યાવરણ સંરક્ષણ, રમતગમત, આરોગ્ય, નશામુક્તિ અભિયાન, ટીબી મુક્ત ભારત અભિયાન, આપદા વ્યવસ્થાપન તથા રાષ્ટ્ર નિર્માણ સંબંધિત કાર્યક્રમોના વ્યાપક અમલીકરણ પર ભાર મૂક્યો હતો.

બેઠકમાં એ પણ નક્કી કરવામાં આવ્યું કે યુવાનોને વહીવટી, સામાજિક, તકનીકી તથા વિકાસલક્ષી પ્રવૃત્તિઓ સાથે જોડવા માટે તમામ સંબંધિત વિભાગો સંયુક્ત રીતે કાર્ય કરશે, જેથી જિલ્લાના યુવાનોને વધુમાં વધુ તકો પ્રાપ્ત થાય અને વિકસિત ભારતના નિર્માણમાં તેમની અસરકારક ભાગીદારી સુનિશ્ચિત થઈ શકે.

બેઠકમાં ધારાસભ્ય સંજયભાઈ કોરડિયા, જિલ્લા કલેક્ટર યોગેશ ચૌધરી, જિલ્લા વિકાસ અધિકારી જયંતસિંહ રાઠોડ, મ્યુનિસિપલ કમિશનર પ્રભવ જોષી, નિવાસી અધિક કલેક્ટર બી.એસ. બારડ સહિત જિલ્લા પ્રશાસનના વરિષ્ઠ અધિકારીઓ, જિલ્લા સલાહકાર સમિતિના સભ્યો, વિવિધ વિભાગોના અધિકારીઓ, શૈક્ષણિક સંસ્થાઓના પ્રતિનિધિઓ, MY Bharatના સ્વયંસેવકો તથા અન્ય સંબંધિત હિતધારકોએ હાજરી આપી હતી અને MY Bharatની પ્રવૃત્તિઓના અસરકારક અમલીકરણ માટે પોતાના સૂચનો રજૂ કર્યા હતા.

---------------

હિન્દુસ્થાન સમાચાર / ભરતસિંહ જાદવ