અમરેલી, 10 જુલાઈ (હિ.સ.) : લીલીયા તાલુકામાં તાજેતરના ભારે વરસાદ અને પૂરથી પ્રભાવિત ખારા ગામની આજે ધારાસભ્ય મહેશભાઈએ રૂબરૂ મુલાકાત લઈને પરિસ્થિતિનો તાગ મેળવ્યો હતો. મુલાકાત દરમિયાન તેમણે ગ્રામજનો સાથે સીધી વાતચીત કરીને તેમના પ્રશ્નો, નુકસાન અને હાલની જરૂરિયાતોની વિગતવાર માહિતી મેળવી હતી.

આ પ્રસંગે વહીવટી તંત્રના અધિકારીઓ, લીલીયા તાલુકા ભાજપના હોદ્દેદારો તેમજ કાર્યકર્તાઓ પણ ઉપસ્થિત રહ્યા હતા. ધારાસભ્યએ સ્થળ પર જ વિવિધ વિસ્તારોની મુલાકાત લઈને પૂરથી થયેલા નુકસાનનું નિરીક્ષણ કર્યું અને અધિકારીઓ સાથે પરિસ્થિતિની ગંભીરતાપૂર્વક સમીક્ષા કરી હતી.

ગ્રામજનોને પીવાનું પાણી, વીજ પુરવઠો, રસ્તાઓની સ્થિતિ, સ્વચ્છતા અને અન્ય આવશ્યક સુવિધાઓ ઝડપથી ઉપલબ્ધ થાય તે માટે સંબંધિત વિભાગોને તાત્કાલિક કામગીરી હાથ ધરવા સૂચના આપવામાં આવી હતી. ઉપરાંત, જરૂરિયાતમંદ પરિવારો સુધી રાહત સામગ્રી અને સરકારી સહાય સમયસર પહોંચે તે માટે પણ અધિકારીઓને જરૂરી માર્ગદર્શન આપવામાં આવ્યું હતું.

ધારાસભ્ય મહેશભાઈએ ગ્રામજનોને વિશ્વાસ અપાવ્યો કે રાજ્ય સરકાર અને સ્થાનિક વહીવટી તંત્ર તેમની સાથે છે અને પૂરગ્રસ્ત પરિવારોને શક્ય તેટલી વહેલી તકે જરૂરી સહાય અને પુનઃસ્થાપનની તમામ કામગીરી પ્રાથમિકતાના ધોરણે પૂર્ણ કરવામાં આવશે.

---------------

હિન્દુસ્થાન સમાચાર / Gondaliya Abhishek Nandrambhai