કચ્છ, 12 જુલાઈ (હિ.સ.) : ભચાઉ તાલુકાના વોંધ ગામમાં ખુલ્લી જગ્યાએ ચાલી રહેલા તીનપત્તીના જુગાર પર ભચાઉ પોલીસે સફળ દરોડો પાડી પાંચ લોકોને રંગેહાથ ઝડપી પાડ્યા છે. પોલીસે સ્થળ પરથી રોકડ રકમ અને મોબાઇલ ફોન સહિત કુલ ₹31,150નો મુદ્દામાલ જપ્ત કરી આરોપીઓ સામે જુગારધારા હેઠળ કાયદેસરની કાર્યવાહી હાથ ધરી છે.

પૂર્વ કચ્છ જિલ્લામાં પ્રોહિબિશન અને જુગાર જેવી ગેરકાયદેસર પ્રવૃત્તિઓને કડકાઈથી કાબૂમાં લેવા માટે પોલીસ મહાનિરીક્ષક ચિરાગ કોરડિયા, પોલીસ અધિક્ષક સાગર બાગમાર તેમજ ભચાઉ વિભાગના નાયબ પોલીસ અધિક્ષક સાગર સાંબડાના માર્ગદર્શન હેઠળ પોલીસ દ્વારા સતત સઘન પેટ્રોલિંગ અને બાતમીના આધારે કાર્યવાહી કરવામાં આવી રહી છે.

આ અભિયાનના ભાગરૂપે ભચાઉ પોલીસ સ્ટેશનનો સ્ટાફ પેટ્રોલિંગમાં હતો ત્યારે ખાનગી બાતમી મળી હતી કે વોંધ ગામ નજીક આવેલા પુલિયા પાસે ખુલ્લી જગ્યામાં કેટલાક લોકો હારજીતના આધારે તીનપત્તીનો જુગાર રમી રહ્યા છે. માહિતીના આધારે પોલીસે તાત્કાલિક સ્થળ પર દરોડો પાડતાં જુગાર રમતા પાંચેય આરોપીઓને રંગેહાથ ઝડપી પાડ્યા હતા.

પકડાયેલા આરોપીઓમાં માનસંગભાઈ છગનભાઈ કોલી (ઉંમર 40 વર્ષ), કાનાભાઈ છગનભાઈ કોલી (ઉંમર 26 વર્ષ), જીતુ અરજણભાઈ કોલી (ઉંમર 30 વર્ષ), અનવર ઈબ્રાહીમ કુંભાર (ઉંમર 32 વર્ષ) અને અકબર ફડીર મામદ ખલીફા (ઉંમર 31 વર્ષ)નો સમાવેશ થાય છે. તમામ આરોપીઓ વોંધ ગામની મહારાષ્ટ્ર કોલોનીના રહેવાસી હોવાનું પોલીસ તપાસમાં સામે આવ્યું છે.

દરોડા દરમિયાન પોલીસે આરોપીઓ પાસેથી ₹15,150ની રોકડ રકમ તેમજ પાંચ મોબાઇલ ફોન મળી કુલ ₹31,150નો મુદ્દામાલ કબજે કર્યો હતો. તમામ આરોપીઓ સામે સંબંધિત કાયદાકીય જોગવાઈઓ મુજબ ગુનો નોંધી વધુ તપાસ હાથ ધરવામાં આવી છે.

ભચાઉ પોલીસના જણાવ્યા મુજબ જિલ્લામાં જુગાર, દારૂ અને અન્ય અસામાજિક પ્રવૃત્તિઓ સામે ઝીરો ટોલરન્સની નીતિ હેઠળ સતત કાર્યવાહી ચાલુ રહેશે. પોલીસે નાગરિકોને પણ આવી ગેરકાયદેસર પ્રવૃત્તિઓ અંગે માહિતી આપવા અપીલ કરી છે, જેથી સમાજમાં કાયદો અને વ્યવસ્થા વધુ મજબૂત બની રહે.

---------------

હિન્દુસ્થાન સમાચાર / Rohit Ramjibhai Padhiyar